Publicado en Ciencia, Museos, Muyeres

El MUJA rinde homenaxe a la Muyer na Ciencia en redol a Mary Anning

El director xeneral de Cultura y Patrimoniu, @pleongasalla, presentó güei la programación de les actividaes del @Museojurasico
para setiembre.  El MUJA rinde homenaxe a la Muyer na Ciencia en redol a la figura de la paleontóloga Mary Anning
ℹ️@http://bit.ly/3mVr99j

El director xeneral de Cultura y Patrimoniu del Principáu d’Asturies, Pablo León, presentó’l programa d’actividaes en redol a la figura de Mary Anning que’l Muséu del Xurásicu d’Asturies (MUJA) entamó para’l mes de setiembre, nun actu acompañada de l’alcaldesa de Colunga, Sandra Cuesta, y de la investigadora del equipu científicu del MUJA, Laura Piñuela. Esti Muséu ye un equipamientu dependiente de la Conseyería de Cultura, Política Llingüística y Turismu y ta xestionáu pola Sociedá Pública de Xestión y Promoción Turística y Cultural del Principáu d’Asturies.

Mary Anning, conocida como la primer paleontóloga, nació en Lyme Regys (Reinu Uníu) el 21 de mayu de 1799 y dedicó tola so vida a la busca ya investigación de distintos tipos de fósiles del Xurásicu asitiaos na mariña del Sur d’Inglaterra. Afayó’l primer ictiosauriu del mundu con solu 12 años al pie de el so hermanu, y los dos primeros cadarmes de plesiosaurios o’l primer pterosauriu atopáu fora d’Alemaña. La so obra foi fundamental nos cambeos qu’asocedieron a principios del sieglu XIX nes idees científiques y l’hestoria de la Tierra.

El programa centráu na so figura va empezar el 4 y 5 de setiembre cola actividá Tres la pista de Mary Anning, na que’l públicu familiar va tener que buscar pistes, resolver misterios y trabayar n’equipu para ser un referente de la Paleontoloxía como ella. Para grupos familiares tamién se va realizar Mary Anning, buscadora de fósiles, un cuentacuentos los díes 18, 19, 25 y 26 d’esti mes que va rematar con un taller nel que se va crear a unu de los personaxes protagonistes con goma *eva o fieltru.

Laura Piñuela, xeóloga del equipu científicu del Muséu, va falar el 11 de setiembre sobro La paleontóloga Mary Anning (1799-1847) y los reptiles marinos xurásicos nuna conferencia na que va dar a conocer el trabayu de busca, preparación y estudiu de distintos fósiles marinos, principalmente reptiles, que realizó Mary Anning a lo llargo de la so vida.

De la mano del equipu científicu del MUJA, el públicu adultu va tener la ocasión d’aprender el 18 de setiembre conceptos básicos sobro los ammonites, xuna variedá de moluscos cefalópodos (parientes de los actuales calamares, sepias y pulpos) que son de gran utilidá na datación relativa de les roques que los contienen, entendíes ente los 380 y los 66 millones d’años, y que los sos fósiles atopar de forma abondosa nos cantiles de Lyme Regis onde trabayaba Mary Anning, según en bona parte de “La Mariña de los Dinosaurios” n’Asturies.

El 25 de setiembre l’equipu científicu va emponer xuna visita sobro los Reptiles marinos de la colección del MUJA. Mary Anning realizó descubrimientos estelantes rellacionaos con distintos reptiles marinos, como ictiosaurios y plesiosaurios, y l’equipu científicu del MUJA afayó ya incorporó a la colección del Muséu varios cadarmes parciales d’estos reptiles, auténticos dominadores de los mares qu’anubrieron el territoriu asturianu mientres la primer metá del Xurásicu, procedentes de los cantiles de “La Mariña de los Dinosaurios”.

Estes actividaes centraes na figura de Mary Anning enmarquense na llínea de trabayu que ta realizando’l Muséu pa poner en valor la figura de la muyer na Ciencia polo xeneral y na Paleontoloxía en particular, cola que se pretende per un sitiu sensibilizar al públicu infantil y xuvenil en materia d’igualdá de xéneru y, por otru, promover vocaciones científiques dende edaes tempranes.

Asina, el MUJA celebra dende va cuatro años el Día de la Muyer y la Neña na Ciencia, un proyectu de la iniciativa 11 de febreru p’averase a la ciencia y visibilizar el papel de la muyer nesta materia nel que s’incluyeron visites empuestes pol Muséu centraes na buelga de la muyer na Paleontoloxía; talleres pa destacar y esplicar los afayos y el trabayu realizaos pola paleontóloga Ángela Milner o la bioquímica Margarita Salas; y l’amuesa Científiques a conciencia, con ilustraciones realizaes por Vanesa Rovira na que dende 2019 y cada añu incorporóse la figura d’una muyer relevante na ciencia, como ye’l casu de les yá mentaes Margarita Salas y Ángela Milner y de la paleontóloga Mary Anning.

La investigadora Laura Piñuela empunxo percorríos pola esposición permanente, talleres o alcuentros online nos qu’al traviés de distintos vídeos ayudó al públicu a entender distintos conceutos pa interpretar y esfrutar de la Xeoloxía y de los dinosaurios. El Muséu tamién realizó Muyeres de Ciencia, vídeos de curtia duración sobro muyeres xeólogues y paleontólogues, afechos a tolos públicos y disponibles na Canal de Youtube del MUJA; o cartelos específicos sobro paleontólogues que tuvieron muncho pesu nel descubrimientu de delles de les pieces que tán espuestes nel Muséu. Amás d’estes actividaes, talleres y conferencies sobro la muyer na Ciencia, el MUJA ta trabayando na inclusión d’información sobro muyeres paleontólogues na esposición permanente.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *