Publicado en Oficios

Jesús Riestra, el postrer molineru de Llanes

Ye la tercer xeneración d’una saga familiar de profesionales de la molienda

Jesús Riestra, el postrer molineru n’activo del conceyu llaniscu, ye yá la tercer xeneración d’una saga familiar de profesionales de la molienda allugaos en L’Agüera.

So güelu foi’l qu’arrendó esta casería con un molín centenariu, una vivienda, una cuadra, dos horros y dolce hectárees de tierra propiedá d’una familia d’emigrantes mexicanos.

Los padres de Jesús llegaron a moler más de 400 quilos diarios de maíz nos años de gloria d’esti tipu de construcciones rurales, pero esto de la molienda nun diba ser un futuru prometedor pa los sos fíos.

A los 16 años Jesús decidió dir pa Xixón pa ganase la vida de lletricista. Ellí pasó más de 40 años de la so vida, pero poco dempués d’españar la burbuya inmobiliaria, allá pel añu 2012, quedó en paru y decidió volver a la so población natal p’ayudar a so padre col oficiu del molín.

Fai yá unos años que Jesús coyó’l testigu de so padre, heredando los sabios conseyos d’un oficiu ancestral que sufre pola falta de veceros y de relevu xeneracional.

Esti molineru, el postrer n’activo del conceyu de Llanes, yá namás lo fai por entretenimientu y pola poca vecería que-y queda de toa una vida. Tienlo repartío per tola contorna oriental, pero viénen-y sobre manera de la zona más próxima al Guadamía.Agora, yá xubiláu, l’últimu guardián d’una tradición ancestral nesti conceyu, tamién s’entretién esplicándo-yos a los escolinos el funcionamientu d’esti molín fariñeru de dos mueles con más de dos sieglos d’hestoria. ​

 

Autor:

Maestra de Llingua Asturiana Colexu Carmen Ruiz-Tilve - Uviéu