- Fonte: La Voz /
La Voz«Ta de boca en boca»: les 12 razones poles qu’el «Financial Times» encamienta visitar Asturies esti branu
Sablera de Quintana (Valdés)
El prestixosu diariu económicu dedica un artículu al Principáu que nun pasa per alto la esmolición qu’esiste por convertise nun destín turísticu de mases: «Ye un momentu que munchos asturianos tán tarreciendo en priváu»
Ye l’enésimu artículu qu’un diariu británicu dedica a esplicar por qué Asturies ye’l destín de vacaciones perfectu. Les campañes de promoción turística siguen dando los sos frutos y el Financial Times, el diariu económicu más prestixosu del mundu, desenvuelve hasta 12 razones poles qu’Asturies ta «de boca en boca».
«Nos sos más de 10.000 kilómetros cuadraos tien dende picos nevaos hasta sableres de sable, dende restoranes rústicos hasta vanguardistas y dende fiestes locales ruidoses hasta valles silenciosos onde inda analayen los osos y los llobos», escribe l’autor del artículu tituláu «Asturies: por qué la mariña cool —xugando con esa doble acepción, xenial o fresca de temperatura, que tien esta palabra inglesa— d’España ye destín de moda esti branu».
L’artículu del Financial Times presenta a Asturies como la rexón verde, escaparpada, a menuda fría y siempres bien regada» frente a la España del sur, col so aspeutu amburao y escoso pol calor del branu», que frecuenten los turistes británicos. «Ríos de rápidu fluxu travisen de sur a norte, desaguando n’una mariña chiscada de pueblos con puertu y afatada con un paisaxe glorioso», menta l’artículu que destaca tamién la «poderosa» idiosincrasia asturiana —«cola so propia cultura y llinguaxe distintivos»— y el tríu de grandes ciudaes que formen «la encantadora capital Uviéu; la zaragatera Xixón, ideal para’l surf, y la formosa Avilés, que finalmente remanez del so cayente postindustrial».
Nun pasa per alto l’autor qu’a Asturies se la vien señalando como abelugu climáticu énte’l calor. «Pa los europeos del norte, históricamente, la mariña cantábrica yera a cencielles demasiao fría y lluviosa pa les nueses vacaciones de branu», esplica, señalando que yá hai signos de que «podría tar a puntu de camudar» la tradicional división del turismu ente’l norte y el sur d’España, onde yá son habituales los 40 graos de temperatura.
«Ye un momentu que munchos asturianos tán tarreciendo en priváu», sigue l’artículu, que cita a unu d’esos asturianos esmolecíos: «Nun tamos llistos pa los ensames». L’autor del reportaxe asume qu’afayar los encantos d’Asturies, «hasta agora poco visitada», va provocar enfadu ente quien nun quieren un paraísu natural masificau y, sía que non, señala que al Principáu quéda-y entá abondo camín per delantre pa aportar a un destín de «sol, mar y sangría» como’l Mediterráneu.
De mano porque escarez d’infraestructura y agospiamientu pa ello, amás de que’l clima «sigue siendo notoriamente impredicible». Y, anque «pue que Asturies nun sía pa toos», sí lo ye (y a futuru) pal autor del artículu —qu’amás s’acaba de mercar una casa na rexón— y pollo numbera les 12 razones poles que considerase qu’Asturies ta de moda.
La primera ye la forma de llegar a Asturies, que yá puede ser, tres la puesta en marcha de la Variante de Payares, per una llínea ferroviaria d’alta velocidá dende Madrid, que «abre la rexón al turismu d’escapada dende’l restu del país», amás de los vuelos directos dende Londres y otres localidaes europees. «Sicasí, hai enforma que dicir sobro llegar en coche: l’autopista A-66 al norte de Llión ufierta unu de los viaxes más impresionantes d’España», destaca l’artículu, que nun pasa per alto’l «máxicu» contraste d’entrar n’Asturies en travesando’l Negrón.
Xuna segunda razón pa encamentar Asturies ye qu’Uviéu ye la Capital Española de la Gastronomía 2024, por que los sos manxares proponen un completu percorríu ensin escaecer les 12 estrelles Michelin que tienen 11 restoranes asturianos. Tener «les meyores sableres de la península ibérica» ye’l tercer motivu y el secretu meyor guardáu» que desvela l’artículu. «Dalgunes de les sableres más perfectes atopense a lo llargo de la mariña d’Asturies», diz l’autor, mentando la maravía que ye Barayo o la sablera del Silenciu, que «fai honor al so nome».
Otres razones de pesu que destaca l’artículu pa visitar Asturies esti branu son la sidra, l’arte perrománicu, el «nuevu luxu rural» —mentando por casu los más de 1.000 euros que puede costar una nueche nun hotel rural de luxu— y los osos, destacando l’artículu que «el turismu d’avistamiento d’osos ye un fenómenu creciente en Somiedu y Fontes del Narcea, dos de les 24 reserves naturales d’Asturies, onde los agospiamientos nos pueblos atienden a un nuevu tipu de visitante».
Faru de Cuideiru Faru de Cuideiru Viva Cuideiru.
Rodrigo Cueves, «del que se diz que ta faciendo pol folk asturianu lo que Rosalia fixo pol flamencu», ye tamién otres de les razones poles qu’Asturies merez xuna visita según l’artículu que Financial Times dedica al Principáu, que cierra’l llistáu de 12 con Avilés y el Niemeyer, les guisanderes—«firmes guardianes de recetes locales centenaries»—, les hasta 329 variedaes distintes de quesos asturianos ente los que se destaca’l Gamonéu y el Cabrales y, nuna mariña llarada de faros», el de Cuideiru, reabiertu como hotel y con impresionantes vistas.
