Publicado en TIEMPU

Estáu del tiempu: Domingu 25 d´ochobre


El tiempu n´Asturies

Bonos díes, bona xente.
Alborecemos col cielu nuboso y delles precipitaciones, con unes temperatures que tan alrodiu de los 12ºC, rexistrándose nel puirtu Payares 7,2ºC. La parte más activa del frente ya nos cruzo , dexando al so pasu más de 25 l/m2 en munches zones d’Asturies.
Güei una vegada col pasu’l frente fríu, vamos tener intervalos nubosos que puen dexar xarabatos dispersos a lu llargu’l día que sedrán más abondosos ya frecuentes pela mañana, sobre too pela costa. Les temperatures descenderán, más bultablemente pela tarde, dándose les mínimes al finar el día. La cota de nieve anicialmente tará mui alta pero dirá baxando col trascursu les hores hasta quedar, al atapecer, sobre los 1300m, pero yá sin malpenes precipitaciones. L’aire seguira soplando con fuercia nes zones altes de montaña ya en puntos del llitoral.
Mañana llunes alboreceremos con grandes claros ya ente’l borrín y la nublina no fonderu los valles, a partir del mediudía dirá aumentando la nubosidá ,pa quedar el cielu nuble pela tarde cuando pue daxe dalgún xarabatu feble ya dispersu que sedrá de nieve perriba de los 1600m. L’aire seguirá soplando gallegu con raches fuertes en zones altes ya en puntos del llitoral con unes temperatures que descenderán les mínimes ya se caltendrán les másimes.
Los prósimos díes seguiremos con airón pero sedrá gallegu-baxu que calecerá l’ambiente ya solu dexará lluvies d’importancia na fastera más surocidental d’Asturies, pa a partir del xueves escamplar del too, perder fuelle l’aire ya subir les temperatures que mos dexarán un ambiente mui sele ya inclusu calurosu.

Autor:

Maestra de Llingua Asturiana Colexu Carmen Ruiz-Tilve - Uviéu