Asturies va tener hasta 100 eólicos marinos y van tar siquier a 14 km de la mariña Les trés árees delimitaes nel Occidente y Xixón, con capacidá para 100 molinos, cumplen los criterios de les zones onde se plantegen proyectos.
La enerxía eólico marín solo va poder desenvolvese nel 0,46 % del espaciu marítimu español
Asturies prevé tener instalaos en 2030 parques eólicos marinos con una potencia d’unos 700 megavatios que van suponer una inversión de más de 2.000 millones d’euros una vegada que’l Conseyu de Ministros aprobó güei’l Real Decretu que regula los Planes d’Ordenación del Espaciu Marítimu (POEM), qu’incluyen como usu potencial de la mar la implantación de parques de xeneración d’electricidá frente a la costa española.
Ente ellos ta la mariña asturiana, onde tán tres de les ocho árees identificaes na demarcación noratlántica -dos na contorna occidental del Principáu y otra frente a Xixón- que cuntaríen con espaciu marín abondo p’allugar esta capacidá, según el Gobiernu asturianu.
Nun comunicáu, l’Executivu autonómicu amosó’l so contentu pola aprobación, tres más de dos años, d’un documentu que llenda les árees definíes considerando les potenciales afecciones a la pesca, al mediu ambiente, al tresporte marítimu y a otros potenciales usos del mar.
