El 20 de febreru celebra’l Día Internacional del Gatu, anque nun ye la única fecha del añu dedicada a estos engañadores animales, como vos cuntaremos nesti artículu. Ello ye que el gatu ye l’únicu animal que celebra’l so día trés vegaes al añu.
L’orixe d’esta celebración débese a un gatu bien influyente llamáu Socks (Calcetos). Yera’l gatu del entós presidente de los Estaos Xuníos, Bill Clinton. Dende 1993 esti gatu vivió na Casablanca y colábase nos actos públicos del presidente, algamando naquella dómina gran popularidá tantu n’EEUU como nel restu del mundu, una y bones el gatu apaecía na sala presidencial mientres los actos de prensa.
Al morrer Socks, el 20 de febreru celebra cada añu’l Día Internacional del Gatu, coles mires de rindir homenaxe a estos animales de compañía y promover una campaña d’adopción para apurrir un llar a los animales caleyeros. Los gatos tamién celebren el so día’l 8 d’agostu y el 29 d’ochobre.
Tamién ye’l Día del Gatu’l 8 d’agostu por coincidir cola dómina de mayor fertilidá nel hemisferiu norte. Nesti casu foi’l Fondu Internacional para’l Bienestar Animal quien lo consolidó como fecha nel calendariu.
Y, por si fora poco, el 29 d’ochobre celébrase n’EEUU el Día Nacional del Gatu a propuesta de Colleen Paige, una esperta nel comportamientu de los gatos, que quixo xenerar conciencia na población, sobro la cantidá de gatos abandonaos poles cais de les ciudaes.
Si tienes un gatu, lo meyor que puedes faer ye dedica-y un ratu a la to mascota, yá sía xugando con él a lo que más-y guste, da-y dalguna llambiotada, o bien a cencielles coyelu y afalagalo…
