La comunidá foi la más visitada en 2022 y, acordies con les previsiones del observatoriu d’EscapadaRural, tamién lo será anguaño. Madrid, Cataluña y Castiella y Llión son les comunidaes de les que vienen más visitantes.
Ta claro que la pandemia, los efectos psicolóxicos del confinamientu y la posterior vuelta a la normalidá provocaron cambeos nos vezos de munches persones. El turismu y la manera na qu’ocupamos los nuesos díes llibres y vacaciones nun son una esceición. Bastante ye que, el turismu rural llogró crecer y consolidase gracies a esti cambéu d’enclín, al ser percibíu como una modalidá d’agospiamientu y esfrute del tiempu llibre más seguru, familiar, menos zaragateru y acomuñáu a la naturaleza y la salú. Nesti contestu, Asturies foi una de les comunidaes (por non dicir la comunidá, en mayúscules) más beneficiada.
Este ye unu de les resultancies que dende EscapadaRural, xuntu col CETT (centru universitariu de Turismu, Hotelería y Gastronomía adscritu a la Universidá de Barcelona) y NetQuest (empresa de recoyida y analís de datos), estrayen del Informe Añal del Observatoriu del Turismu Rural. Esti estudiu busca conocer los vezos de consumu del turismu rural per parte de los viaxeros.
Judith Monmany, responsable de Relaciones Públiques y Comunicación d’EscapadaRural, resalta que «en 2022 Asturies foi la comunidá más visitada n’escapaes rurales» y en 2023 «les perspectives son bien bones».
Acordies con los sos datos, a nivel de Comunidá Autónoma, aquelles que resulten más curioses como destín para’l turista rural son Asturies (15%), Andalucía (13%), Castiella y Llión (11%), Cataluña (8%) y Cantabria (7%). El Principáu (33%), Cantabria (26%), Huesca (17%), Navarra (15%) y Teruel (12%) perfílense como les provincies que más viaxeros rurales quieren visitar en 2023.
