Publicado en Sin categoría

Farina de castaña

Xosé Francisco Pérez. Ceador y xerente de BosQfrut

«Cuando empecé yá tenía más demanda que producción»

La farina de castaña ye un superalimento que pocu tien que ver cola de trigu. Los sos usos son variadísimos y sirvió para afitar l’interés rexonal pol árbol.  José Francisco Pérez creció ente castañales ensin entender «la falta d’interés por un árbol y un frutu que da tantu a la rexón». Esti cuartanu, decidíu a poner a la castañal nel llugar que se merez, empezó a faer farina.

BosQfrut nació en 2013 y agora ye como xuna bola de nieve que nun frena: la producción crez cada añu llegando a toa España y espertando interés n’Europa. L’oxetivu al curtiu plazu ye sumar a la so ufierta productos terminaos ellaboraos cola farina de les castañes que recueye cada temporada.

-¿Cuál ye l’orixe de BosQfrut?

-Vien de llueñe, d’una trayectoria familiar venceyada a la madera de castañal. Crecí nun ambiente nel que tou terminaba redundando na castaña, lo que nel mio casu s´enfatizó hasta espertar un interés casi obsesivu por sacar más del árbol de lo que se taba faciendo n’Asturies. Vía cómo cayía en picáu la so carpintería y díbase perdiendo daqué que dio muncho trabayu na rexón y cómo s’esbardiaba’l mayor llurdiu verde de castañal de la cornisa cantábrica. Nun sé por qué había un tabique. Curiosamente nun se-y sacaba rendimientu de forma profesional y relevante. Nin siquier intentábase dar una oportunidá a un frutu qu’equí se desperdicia nel monte ente que n’otres comunidaes crea puestos de trabayu y riqueza.

-¿Y qué decide faer?

-Empiezo a estudiar de qué forma, vidable y facedera nel tiempu, puedo aprovechar la castañal. Veo que xunas coses tiren, qu’otres non y que la ellaboración de farina acaba siendo lo más relevante porque puede llegar a veceros bien esvalixaos xeográficamente.

-Produz el so propiu frutu, ¿non?

-Esto ye un círculu zarráu en redol a la castaña, pos la necesidá de que xuna de les partes funcione oblígate a ser el to propiu provisor de planta autóctona porque nun los hai. Tengo un viveru, producción de castaña y ellaboración y vienta directa de farina. Tamién tengo daqué de nuez, que tien bien de demanda.

-¿Cuándo empieza, qué producción tien y de qué variedaes?

-Los primeros árboles llantelos en 2010 y en 2013 fixi los primeres ellaboraos. Yá había entós más demanda que la farina que yo podía producir, asina que fuimos creciendo añu a añu; agora fago a daqué más d’una tonelada por temporada. Nun m’atrevo a falar de producción añal porque varia enforma en función de la climatoloxía y d’enemigos, lo que tengo ye monte con capacidá de producir castaña en 15 hectárees, de les qu’ocho tán n’ecolóxicu y siete riquiríen trabayu preparatorio. Ente’l 80% y el 90% de la mio castaña ye valduna; el restu, miguelina, doriga y parede pa tener llanta madre.

-¿Qué enemigos?

-L´avispilla de la castañal y el chancro. La primera ye de recién apaición y cébase con variedaes autóctones. Les perdes son impresionantes ente les dos.

-¿Cómo ye la farina de castaña?

-Nun tien nada que ver cola de trigu, son alimentos distintos anque-y les acomuño por ser farines y puedan combinase pa, por casu, repostería. Nun digo que la de castaña tea percima, digo que ta a años lluz tocantes a propiedaes, calidá y cualidaes ensin entrar en que la de trigu tien gluten y la de castañal non. Xuna y otra nun nos dexen faer les mesmes coses.

-¿Qué dexa la suya?

-Ye orgánica, puede consumise seca: xuna cuyar na lleche y tires como un avión tou la mañana. En repostería pueden faese munches coses, pero hai más: potaxes, cremes y sirve como espesante. Tengo un veceru que lu usa en bébores vexetales pa intolerantes a la lactosa porque al tener azucre natural ufierta un sabor prestoso; otru veceru, gallegu, l’amiestu con algues y unviales al mercáu asiáticu, y un maño emplegales como suplementu enerxéticu porque tien tolo que demanden los deportistes. La farina de castaña ye un ‘superalimentazo’ ricu en magnesiu y calciu. Tuvi hasta una ufierta de República Checa, que la queríen pa una cerveza, pero nun tenía la capacidá p’aceptala.

-¿Qué entama de cara al futuru?

-Toi en pruebes de galletes, quiero sacar daqué que valga de reclamu pa probar la farina.

-¿Notó qu’en pandemia se buscara más farina?

-Vendí lo mesmo, porque la producción ye la que ye, y a los mesmos veceros, pero sí que lu escosé más rápidu.

-Nestos años, ¿aprendimos a valorar la castañal?

-Sí, a lo menos hai interés ya interés y creo que si nun hai más ye porque lo ven como un procesu lentu; llevo dos años vendiendo toles plantes que pongo nel invernaderu. Agora que ta ellaborándose un nuevu Plan Forestal n’Asturies, dame mieu que s’acabe llexislando pal pinu y l’ocalitu y déxese la castañal como secundariu cuando ye bien nuesu y supon tantu.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *