Publicado en Quesos

El Quesu de Fuente

Entamó a ellaborase como aperitivu pa quien diba a la yerba

La so tradición foi perdiéndose, nun ta a la venta y la so producción ye mui poca

El quesu de Fuente toma’l so nome de la fuente de madera de castañal na que s’ellabora, condición indispensable na fabricación d’esti productu lacteu típicu del conceyu de Proaza.

Una tradición ancestral que llegó hasta los nuesos díes gracies al llabor de colectivos como la Sociedad Cultural Peñas Juntas, quien s’encargó fai yá años de recuperar la so hestoria.

El quesu de Fuente, qu’empezó a ellaborase como aperitivu pa quien diba a la yerba, ellaborao a partir de lleche de vaca en crudo, a la que s’amiesta a lo llargo de la ellaboración fermientu d’un añu pa otru, sal y llicor de caña, productu esti postrer sustituyíu anguaño por oruxu. Una tradición gastronómica que se foi perdiendo colos años.

Clemente Alonso ye unu de los pocos vecinos del conceyu qu’anguaño entá lo ellabora y que tresmitió’l so saber a la so fía María.

Son tres meses d’ellaboración pa llograr un quesu pastoso, cremoso, d’apariencia nidia pero con un característicu sabor fuerte y picante, ideal pa combinalo cola dulzura del pan d’escanda o de maíz. Anguaño, el quesu de Fuente arralez porque nun ye un productu que tea a la venta.

Los pocos vecinos que lo ellaboren fáenlo pa consumu propiu, con una esceición: les Xornaes Gastronómiques de los Nabos y del quesu de Fuente que, hasta la pandemia, Proaza celebraba la última fin de selmana de xineru y onde se rindía tributu a esti quesu tan enraigonáu cola hestoria del conceyu.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *