Publicado en Arte

El llargu viaxe ensin final d’una xoya prehistórica asturiana

El propietariu del «Caballín de La Viña», una talla de 14.000 años d’antigüedá, asegura que tien siquier «dos bones ufiertes» de grandes museos comenenciudos fora d’Asturies

Fai siquier 14.000 años, un home o muyer prehistóricu tallaba con gran remangu un estil de venáu usando finos buriles de xiles. Con esa pieza realizó una magnífica ferramienta decorao en forma de cabeza de caballu. Dempués vamos ver una hipótesis de para qué la fixo. El casu ye qu’ese oxeto durmió ocultu mui cerca d’Uviéu mientres 140 sieglos, soterráu o abandonáu n’unu cuévanu predresu, y tornó a la lluz nel añu 1978. Equí empieza’l perllargu periplu inacabáu de «El Caballín», como lo llama’l so actual posesor y descubridor del abrigu de La Viña, Antonio Juaneda.

Esta pieza única, una de los meyores d’Europa, si non la meyor», como afirma Juaneda, permanez en manos privaes dende fai 43 años. Viaxó al otru llau del océanu, tornó a Asturies y entá ta por atopar el llugar que se merez para ser almirada públicamente.


Anversu y aviesu del «Caballín de la Viña», una talla prehistórica econtrá nun xacimientu del conceyu d’Uviéu

Trátase d’una cabecita de caballu llabrada d’unos 74 milímetros de llargu y de bultu redondu, tallada por dambes cares (una ta parcialmente deteriorada), na que se representen fielmente los güeyos, ollares, quexal, oreyes y la pelame del animal. Un estudiu que se ta realizando con microscopiu electrónicu de barríu y lente binocular va confirmar cómo foi’l procesu de fabricación.

Tamién quier faese una datación con espectrometría de mases con aceleradores (AMS), una técnica bien precisa y fayadiza para pequenes amueses que confirmaría lo que los espertos yá señalaron va años, la so pertenencia al periodu Magdaleniense, del qu’hai numberosos exemplos nel sur de Francia. Para ello estrayeráse una cantidá bien pequena de partícules ósees de la zona interior y esponxoso (cara reversa), onde yá tien unu frayatu, con oxetu d’estropiala lo menos posible.

L’orixe

Volvamos al momentu del afayu del Caballín. A mediaos d’ochobre de 1978, Juaneda, un investigador autodidacta (agora con numberosos descubrimientos a los sos llombos), visita un gran abrigu predresu, daqué paecíu a un recuestu del monte, cercanu al pueblu de La Mazaneda, nel conceyu d’Uviéu. Ye l’Abrigu de La Viña. Ellí afaya una serie de grabaos nes parés de piedra qu’ocupen unos 30 metros de llargor, según restos arqueolóxicos a la vista, na superficie del suelu.

El llugar ye aparente como abelugu. Como describió na so publicación Una escultura magdaleniense inédita procedente del abrigu de La Viña (Sautuola/XXII, 2017), «disponía de bones condiciones d´habitabilidad y unu allugamientu privilexáu, lo que dexaba un bon control visual del territoriu circundante. Unes ventayes que, ensin dulda, supieron valorar los sos moradores paleolíticos».

El 31 d’ochobre, un día dempués de echar voz de el descubrimientu al departamentu de Prehistoria de la Universidá d’Uviéu, Juaneda torna al abelugu de La Viña con un amigu, Luis González, que como aficionáu a la fotografía ayudaríalu a tomar bones imaxes.

L’Abrigu de la Viña, un xacimientu prehistóricu con arte parietal allugáu
nel conceyu d’Uviéu (Asturies) qu’ocupa unos 300 metros cuadraos

Mientres esaminen el suelu, Juaneda recueye dellos oxetos ensin dulda antiguos y González atopa lo que paecía una pequena figura tallada, estazada y abondo cubierta de sedimentos d’ocre. Al llavala na fonte cercana, apaez na so rellumanza la cabeza del Caballín. Ye un afayu magníficu y Juaneda, consciente del so enorme valor patrimonial, dispusose a guardala col enfotu de apurri-y la al Muséu Arqueolóxicu Provincial, pero Luis González puso torgues: atopolu él y, por tanto, aportuna en queda-y la. Asina foi. González caltuvola para sí mesmu como un «talismán» magar les protestes del so compañeru.

Unos dos años dempués, Juaneda propón la posibilidá de publicar un artículu nel boletín de la Idea (Institutu d’Estudios Asturianos, güei Ridea) al traviés del contactu con Magín Berenguer, que supo apreciar la importancia de la escultura prehistórica, previa entrega del exemplar al Muséu Arqueolóxicu. Pero Luis González negose en redondu a esprendese del «amuletu», asina que la publicación apaeció bien amenorgada.

Un añu dempués, por cuenta del so trabayu, González treslladadase a Estaos Xuníos y llévase el Caballín con él. Esi esiliu habría de durar nada menos que 23 años. Mentanto, l’arqueólogu Javier Fortea investiga La Viña y da a conocer notables afayos, pero quiciabes nengún tan relevante y perfectu como esa figurina.

Cunta Antonio Juaneda que, mientres una estancia en París, visitó al prestixosu prehistoriador Henri Delporte, mientres años conservador del Muséu d’Antigüedaes Nacionales en *St. *Germain-en-*Laye. Acompáñalu González, a quien convenció para amosa-y el Caballín a Delporte.

La sorpresa del científicu francés foi enorme: «¡magnifique… xune oeuvre extraordinaire!», diz qu’esclamó al vela. Pero non solo pola so preciosa manufactura, sinón, sobremanera, pol llugar del afayu. «Hasta esa fecha nun saliera igual n’España, nun-y lo podía creer», cuenta Juaneda. Pero yera ciertu.

La ferramienta

Ye cuando Delporte esplíca-yos la posible función del Caballín, como parte d’uno ferramienta realizada col estil de venáu completa. La cabeza sería en realidá l’estremu d’un propulsor, un mangu col que los homes prehistóricos llanzaben, por casu, una flecha. Depués quebróse y quedó dixebrada, un fechu frecuente, según los investigadores, que fai que se confunda con un colgante, cuidao que para eso aprovechábense una vegada rotes.

Una representación del posible usu, como llanzador, de la ferramienta prehistorica tallada de la que s’esprendería’l «Caballín de la Viña», atopáu nun xacimientu arqueolóxicu d’Uviéu .

¿Y nun ta fora de contestu? «Claro», respuende Juaneda, «como la gran mayoría de les pieces qu’agora s’esponen nos museos y que fueron recoyíes cuando nun esistíen los métodos actuales. Y non por ello tienen menos valor, como puede vese en cualesquier de les grandes colecciones europees».

Años más tarde, escontra 1992, Magín Berenguer contacta con Juaneda para incluyir el Caballín nun llibru sobro arte prehistórico, pero Luis González opúnxose frontalmente, «resentíu pola mala esperiencia vivida con Magín años tras».

La torna

Finalmente, González, gravemente enfermu, vuelve a Asturies y por conseyu de la so familia comunícalu a Juaneda la so disposición a que la pieza sía donada al Arqueolóxicu.  Tamién destaca l’atentu interés de la pieza per parte de César García de Castro y María González Pumariega, toos ellos profesionales de reconocíu prestíu.

Les condiciones por que pasara a formar parte del patrimoniu públicu yeren sencielles: que se publiquen en portada y como artículu principal de la revista d’Escavaciones Arqueolóxiques n’Asturies (EAA), la realización d’unos retruques de la figurina pa ellos y un permisu pa Juaneda p’aportar a la Viña. Pero finalmente les condiciones nun se cumplieron per parte del Principáu y, poro, la entrega atayóse.

L’heriedu»

En septiembre de 2009, Luis González fina y espresa a los sos fíos el deséu de qu’el Caballín pase a manos d’Antonio Juaneda. Nuna cafetería d’Uviéu, dientro d’una caxina, apúrren-y el preciada ayalga, «unu de los momentos más felices de la mio vida», diz l’investigador. Un nuevu intentu de donalo, a cambéu del derechu de poder faer unes semeyes en La Viña que-y foi negáu a Juaneda, increíblemente volvió torgar la operación.

¿Y el futuru?

El posesor del Caballín nun s’amuesa descomanadamente optimista: «Hasta apocayá, taba casi seguro de que diba salir d’España. Tengo dos ufiertes bien interesantes, xuna d’Estaos Xuníos y otra d’Alemaña, pa esponela en condiciones estraordinaries, como ten de ser. Non atropaes/amontonaes con otres pieces, nin nun rincón».

Anque la figurina algamaría un altu valor económicu si vendiérase (asegura qu’un coleccionista llególu a ufiertar 40.000 euros), Juaneda aportuna en que nun s’esprenderá d’ella por dineru, sinón baxu xunas condiciones y por que sía espuesta nel sitiu que merez.

Pero hai esperanza porque, según señala, «apocayá la nueva directora del Muséu Arqueolóxicu, María Antonia Pedregal, y el director de Patrimoniu, Pablo Llión, interesáronse pol Caballín y amuesen enfotu en que forme parte del patrimoniu asturianu». «Tengo bien bones percepciones nesti sentíu», añede, xuna actitú que los estimo enforma». De cuenta que el final feliz d’esa hestoria de 14.000 años entá ta por escribir.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *