Publicado en NATURA

Cinco frangüesos más vuelen yá sobro los Picos d’Europa

Un exemplar de frangüesos/quebrantahuesos  Y.P.

Con ellos, yá son 30 los exemplares que se reintroducieron nel parque, dientro del proyectu pa la recuperación de la especie empecipiáu en 2010


Cinco frangüesos más fueron lliberaos esti branu nel Parque Nacional de los Picos d’Europa colo que yá son trenta los exemplares -19 femes y 11 machos- que se reintroducieron nesi espaciu protexíu dientro del proyectu de recuperación de la especie empecipiáu en 2010.

Tolos exemplares lliberaos son cedíos pol Gobiernu d’Aragón al proyectu que desenvuelve la Fundación pal Caltenimientu del Frangüesos (FCQ) en coordinación coles autoridaes ambientales del Principáu d’Asturies, Cantabria y Castiella y Llión.

En superando les distintes fases del so desenvolvimientu nes instalaciones del centru de cría de Zaragoza y darréu nel Parque Nacional d´Ordesa y Monte Perdíu, onde tomen contactu con otros exemplares de la so especie, son treslladaos hasta Asturies pa completar el so procesu de maduración.

A los trenta animales yá lliberaos hai que sumar la presencia esporádica d’exemplares divagantes que visiten los Picos d’Europa tolos años, exemplares de diversa procedencia y na so mayoría pirenaicos, anque se repararon otros procedentes de los proyectos de recuperación de la especie que se lleven a cabu n’Andalucía y en Castellón.

Según informó la fundación que xestiona’l programa, la evolución de los pollos d’anguaño fuera la esperada y yá s’atopaba en condiciones aparentes pa volar cuando la pasada selmana ficieron l’apertura de la xaula por qu’empiecen la so vida en llibertá, previa autorización de la Conseyería de Mediu Rural y Cohesión Territorial del Principáu.

A partir d’esti momentu los técnicos especialistes de la FCQ van siguir a los exemplares de barganal diariamente al traviés de dispositivos de radioseguimientu terrestre y GPS pa xixilar los sos movimientos, la so alimentación, comportamientu y primeros vuelos.

El proyectu de reintroducción del frangüesos nel Parque Nacional de los Picos d’Europa#empecipió en 2010 cola suelta de los dos primeros exemplares nun espaciu onde la especie taba estinta dende la década de los años cincuenta del pasáu sieglu y en 2020 producióse la primer reproducción esitosa tres 75 años d’ausencia.

Anguaño la pareya formada por Deva y Casanova volvió intentar la reproducción, pero lamentablemente fracasaron nos primeres estadíos y, según la fundación, los próximos exercicios son esperanzadores yá que hai dellos exemplares entrando na edá reproductora empareyaos y qu’ocupen territorios óptimos pa la especie.

El frangüesos atópase nel nivel más altu de protección na Unión Europea, incluyida España onde ta declaráu como especie en peligru d’estinción, y la so reintroducción de forma estable nos Picos d’Europa favorecería’l fluxu ya intercambiu d’exemplares cola población pirenaica al traviés del corredor íberu-cantábricu y xuna garantía pal caltenimientu de la especie énte posibles eventos que pudieren afectar a unu de los sos núcleos reproductores, informa Efe.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *