Publicado en Asturianu, Empreses, FIDMA Xixón

Nueve empreses con productos y servicios n’asturianu comparten espaciu na FIDMA

Iniciativa pol Asturianu ta presente un añu más na Feria Internacional de Muestres d’Asturies (FIDMA) con un puestu pa dar a conocer el coleutivu y visibilizar l’idioma ente los miles de visitantes que pasen tolos díes pel recintu, dende’l 7 al 22 d’agostu en Xixón.

Al traviés de la presencia na FIDMA (pabellón 3-4, puestu 9B), Iniciativa pol Asturianu quier mostrar como l’asturianu ye un elementu de creación empresarial, orixinando actividá económica, puestos de trabayu y, polo tanto, riqueza. Una montonera d’empreses de diferentes sectores qu’utilicen l’asturianu na so actividá comercial: Puru Remangu, Trabe, Cartonaxes VIR, Cuatro Gotes, 9000 Soluciones, Nordés Móvil, Asturcón Seguridá, Cerveza Caleya, Acuto Xuegos y Tiza y Peonza.

Amás, con tola variedá de productos y servicios de les empreses, la organización quier facer ver como la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses.

Amás de poder mercar un llibru, una cerveza, un xuegu o una camiseta n’asturianu, el visitante tamién va tener la oportunidá de conocer el funcionamientu d’Iniciativa pol Asturianu y asociase. Pel puestu pasaron nestos trés primeros díes políticos como’l secretariu xeneral de Foro y diputáu Adrián Pumares, l’eurodiputáu socialista Jonás Fernández Álvarez y l’alcalde de Mieres Aníbal José Vázquez; responsables de SNL, como María Xosé Rodríguez López (Xixón); o los miembros del Coro Minero de Turón, ente otros.

La sesentena cuarta edición de la FIDMA celébrase en Xixón hasta’l día 22. El so horariu ye de 11 a 22 hores.


Iniciativa pol Asturianu ta trabayando na organización del espaciu ‘Empreses pol asturianu’, onde como ye habitual van participar empreses y profesionales que tienen presente al idioma na so actividá comercial.

Al traviés d’esta iniciativa, la organización pretende facer llegar a la ciudadanía que l’asturianu ye un elementu de creación empresarial, xenerando actividá económica, puestos de trabayu y, polo tanto, riqueza.

Iniciativa pol Asturianu, que nun recibe nengún tipu d’ayuda pública, quier qu’esti espaciu seya un llugar d’alcuentru y un escaparate a la sociedá de la importancia que tien l’asturianu na economía asturiana. L’espaciu va topase nel pabellón 3-4 del Palaciu de Congresos.

Axenda pa profesores

Nel puestu van poder alcontrase los materiales d’Iniciativa pol Asturianu. Como novedá esti añu vamos cuntar cola axenda solidaria n’asturianu de Profes n’Apuros. Trátase d’una axenda pensada pol y pal profesoráu con espaciu acutáu pa planes, cursos, conceyos y xeres pendientes. Toles secciones tan disponibles na mesma axenda: horarios, contactos, llistes d’asistencia, planificación añal, cumpleaños, evaluaciones… L’axenda fai un percorríu mes a mes al traviés d’una montonera de recursos, xuegos y documentales pa desaprender y abordar la diversidá de xéneru ya la igualdá de manera global, ensin etiquetes. Esta axenda solidaria n’asturianu ye posible gracies a la collaboración ente Profes en Apuros ya Iniciativa pol Asturianu.

L’axenda tien un preciu de 16,00 euros pa les persones asociaes a Iniciativa pol Asturianu y de 19,00 euros pa los/les que nun seyan socios/es. Amás de na Feria de Muestres, puede mercase na oficina d’Iniciativa pol Asturianu nel Hotel d’Asociaciones del Conseyu de Mocedá de Xixón (Avda. Manuel Llaneza, 68, baxo, Xixón) de llunes a viernes de 10:00 a 13:00 hores y en Cuatro Gotes Producciones (Cai Emilio Tuya, 51, Xixón) n’horariu d’oficina. Tamién ye posible mercala llamando o escribiendo un Whatsapp al 675 977 751 y na dirección de corréu electrónicu: info@iniciativapolasturianu.org.

 

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *