José Ramón Crespo, 42 años sacando llustre L’últimu limpiabotas de la ciudá, inda n’activu, foi tamién lexonariu y emplegáu de la plaza de toros
- Semeyes de Luisma Murias LNE
Detalles de la operación para dar llustre al calzáu. |
José Ramón Crespo Miranda presume, y con razón, cuando afirma que ye l’últimu limpiabotas d’Uviéu. Nació en Corao fai 63 años, anque-y gusta dicir que lleva n’Uviéu casi tola vida, nada menos que 42 años dando llustre a los zapatos. Casi tol día pasase na cafetería Ovetus, onde entá conserva una vecería fiel. «Y voi siguir llimpiando zapatos hasta que tenga salú», precisa.
Tamién-y gusta dicir que llimpió zapatos a toos: dende les persones más humildes hasta al Príncipe d’Asturies. Cuando lo recuerda dibúxase-y una sorrisa na cara. Un bon día, tando na yá zarrada cafetería Abantos, recibió una llamada que-y costaba creer: «¿Fai llimpiar los zapatos al Príncipe d’Asturies?». La respuesta nun se fixo esperar. «Sí home, sí, nun faltaba más». Y como ye un bon conocíu de la Policía pol so pasáu lexonariu y home de bien, entró nel hotel de Reconquista hasta l’habitación del Príncipe ensin que fuera cacheáu. «Sosprendióme’l so campechanía y sobremanera que me preguntaren cómo llevaba lo de limpiabotas. Díxi-y que la cosa yá taba un pocu fluexa». Esplica qu’énte’l Príncipe atopose con una persona senciella, «igual que’l padre cuando lu conocí», y sobremanera cuando sacó venti euros del so bolsu y apurriomelos diciéndo-y: «Por que tomes xunas copes a la mio salú». Pero lo que-y emocionó foi la cariñosa despidida: «Sigue asina porque trabayes perbién y veo que yes xuna bona persona, díxome, diome la mesma impresión qu’l so padre cuando lu conocí en Melilla».
¿La técnica? «Hai qu’empezar quitando’l polvu, dar anilina y dempués ensugala y da-y rellumu, y, de siguío, poca crema y enforma cepiyu. Y tou esto ensin escaecese de los tacones»
