Publicado en Mazcaraes, Tradiciones

L’aguilandu, una tradición del iviernu asturianu

A lo llargo de los años, nos pueblos siempres hubo munches costumes coles que celebrar el final d’un añu y l’empiezu del siguiente. N’Asturies, nestes feches d’iviernu siempres foi bien celebráu l’aguilandu. Siguiendo esta costume, los y les moces van dir pidiendo dineru o comida a los vecinos en faciendo dalguna pequena actuación o dalgún cantar. Para esto, en munches zones yera importante dir mazcaráu, hasta’l puntu de qu’en zones como Tameza l’acción de dir pidiendo conozse como mazcaráu.

L’aguilandu pidíase de normal en Nuechebona. Al escurecer, neños y neñes pequeñes xuntábense para pidir nes cases de los vecinos del pueblu, o inclusive nos pueblos de la contorna. Por casu, en San Román (nel conceyu de Sariegu) diben a Pedrosa y Verdera (pueblu vecín, pero del conceyu de Cabranes). Solíen dir con una pandereta, unu zambombu y una cesta para meter lo que-yos dieren. Los neños diben picando en cada casa diciendo “¿Cantar, rezar o echar a andar?”. Si na casa ciscaben rezar, los neños rezaben dalgún Padre Nuesu o Ave María por dalgún difuntu. Esto faía de normal nes cases nes qu’acababa de finar daquién. Si lo que ciscaben yera cantar, los neños cantaben coples como:

Deme l’aguilandu, señora güelina, Un galipu fabes y una manteguina

En cantando, a los neños dábase-yos de normal una perrona, cuatro castañes, mazanes, nueces, dalgún chorizu… que metíen na cesta. Sicasí, tamién podíen atopase con dalguna casa onde nun-yos daben nada.

N’otros llaos ye costume pidilo representando una auténtica comedia, como ye’l casu de los zamarrones de L.lena o los guirrios y sidros del Valle del Nalón y Siero.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *