- Fonte: Ver Asturies /
Como tolos años, y yá van 23 ediciones, mientres los díes 1 y 2 d’abril vuelve a Corniana la Feria del Salmón, una fiesta d’Interés Turísticu Rexonal que se convirtió n’una fecha imprescindible nel calendariu por tener un momentu tan especial y únicu como la puya del campanu, que pocu tiempu antes foi pescáu nel ríu que baña a la villa, el ríu Narcea.
Pero si pensabes que namá vas esfrutar del arte de la pesca nel conceyu de Salas, tas equivocáu. La caza tamién tien el so espaciu nesta feria desque empieza hasta que termina, con delles actividaes qu’amuesen l’oficiu.
La primer xornada, la del 1 d’abril, va empezar a les 10:30 hores con una exhibición de rastrexu de xabalín pa, casi una hora dempués, a les 11:15 hores, realizar la inauguración de la cortil ferial onde se desenvuelve esti eventu en redol a la caza y la pesca. Tres ello, les actividaes van dise asocediendo, pudiendo atopar charres-atopo, presentaciones de competiciones o diverses ponencies en redol a la pesca. Mientres la xornada del 2 d’abril, la feria va abrir dende les 11:00 hores. A lo llargo del día apurrirán los premios de diversos concursos, amás del I Concursu de Tiru Virtual Capenastur.
Pero ensin dulda, el momentu clave del domingu va ser la puya del campanu. Tres la correspondiente pesca del exemplar, el Conceyu de Salas va poner a disposición del pescador la infraestructura pa la puya y va faése-y entrega del troféu, amás d’un llote de material de pesca y un vale por una comida nel Restorán Casa Ricardo. Darréu, va empezar la puya, que’l so horariu va depender de la hora de la pesca. Si l’exemplar ye pescáu antes del mediudia, va efectuase a les 13:00 hores, ente que si realiza la pesca darréu, va ser puyáu a les 18:00 hores.
A tollo súmase-y el tradicional mercáu agroalimentariu y actividaes complementaries como la ruta del salmón, la visita empuesta al monesteriu o talleres varios, que se van asoceder mientres la fin de selmana. ¿Entá duldes d’averate a la Feria del Salmón de Corniana y conocer l’arte de la caza y la pesca? Equí dexámoste’l cartelu completu.
