- Fonte: Xixón al día /
Asturies recibió nel primer trimestre a 1.040.843 turistes, un 21% más que nel mesmu períodu de 2022, según los datos publicaos güei pol Institutu Nacional d’Estadística, que reflexen tamién una medría del 18% nes pernoctaciones mientres esi períodu, hasta algamar un total de 2.150.872 en tolos tipos d’agospiamientu (hoteles, campings, apartamentos, albergues y establecimientos de turismu rural).
Nel casu del turismu rural, Asturies caltiense como la comunidá líder del norte d’España, col mayor númberu de viaxeros y estancies de la cornisa cantábrica. Amás, el turismu internacional consolida la so positiva evolución, con una crecedera acumulada del 51%. Nos primeros seis meses del añu visitaron la comunidá 236.642 persones procedentes del estranxeru, lo que supon el 22,7% del total rexistráu n’agospiamientos colectivos.
Les cifres globales del primer semestre son la resultancia d’una evolución positiva sostenida ya impulsada polos rexistros del mes de xunu, cuando s’amontó un 19% el númberu de visitantes y un 16% el de pernoctaciones. Tanto los establecimientos rurales como los campings superaron esta media, con xubíes interañales del 29% y del 43%, respectivamente, al respective de xunu de 2022.
