Publicado en Curiosidaes, NATURA

Cómo miles de millones de rayos pudieron ser l’orixe de la vida na Tierra

Los rayos pudieron ser clave para la formación de la vida na Tierra.

Hai una nueva pieza nel rompecabeces del orixe de la vida na Tierra.  Miles de millones de rayos que bombardearon la Tierra mientres un llargu periodu pudieron ser la chispa que dexó que la vida empezara a formase nel nuesu planeta. Esa ye la conclusión a la que llegó una recién investigación de la Universidá de Yale n’Estaos Xuníos y l’Universidá de Leeds, en Reinu Uníu.

L’estudiu sostien que mientres millones d’años los rayos qu’impactaben la Tierra fueron lliberando’l fósforu necesariu para la creación de les biomoléculas que fueron la base de la vida nel planeta. Los autores de la investigación afirmen qu’el so afayu ayuda a entender cómo pudo habese formáu la vida na Tierra y cómo podría tar formándose n’otros planetes.

La clave ye’l fósforu. El fósforu ye esencial por que se produza vida.

Esti elementu quimico, sicasí, nun taba fácilmente disponible na Tierra primitiva, yá que taba bloquiáu dientro de minerales insolubles na superficie del planeta. Mientres muncho tiempu, los científicos preguntáronse cómo’l fósforu de la Tierra fíxose accesible p’ayudar na formación del ADN y otres biomoléculas necesaries pa la vida. Esti nuevu estudiu suxure qu’esi fósforu volvióse disponible gracies a los rayos qu’impactaben la Tierra.

Cuando un rayu cute’l suelu puede crear fulguritos, una formación vítrea que contien schreibersita, un mineral que de la mesma contien fósforu. Los fulguritos contienen daqué del fósforu de la superficie del suelu, pero en forma soluble.

Con base en modelos computacionales, los investigadores calcularon que fai ente trés mil quinientos y cuatro mil quinientos millones d’años, cuando la vida empezaba a formase, la tierra firme del planeta yera impactada por barganal d’ente cien y mil millones de rayos cada añu. Eso, n’un periódo de mil millones d’años, equivaldría a un total d’ente 0,1 y 1 quintillón de rayos (1 siguíu de 30 ceros) ayudando a la formación de fósforu nel planeta.

Bombardéu constante. Enantes, otres investigaciones suxurieren que la fonte de la schreibersita yeren los meteoritos. Esti nuevu estudiu sicasí, afirma que la cantidá de meteoritos nun fuera abondu, y tampoco fuera constante, como sí lo fueron los rayos. Amás, ye probable que los rayos fueren más frecuentes en rexones tropicales, apurriendo árees más concentraes de fósforu aplicable, según l’estudiu.

Los investigadores calcularon que mientres la etapa de formación de vida nel planeta, los rayos pudieron ser l’orixe d’ente 110 y 11.000 quilos de fósforu cada añu. Esa cantidá pudo ser abonda p’ayudar a la formación de vida, según diz-y al portal Live Science Benjamin Hess, estudiante de posgrado nel Departamentu de Ciencies de la Tierra y Planetaries de Yale, coautor del estudiu.

«Por que se forme vida, solo ye necesariu qu’haya un llugar que tenga los ingredientes fayadizos», dixo Hess a WordsSideKick.com, citáu nun reportaxe de Live Sicence.

«Si [110 kg] de fósforu al añu concentrense nun solu arcu d’isles tropicales, entós sí, bien podría ser abonda. Pero ye más probable qu’eso asoceda si hai munchos d’esos llugares». Según Hess, estos afayos converten a los rayos en bonos candidatos p’ayudar a entender l’orixe de la vida na Tierra.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *