Publicado en Xuegos Olímpicos

La representación asturiana en Tokiu, en busca de medaya

Na semeya, Estadiu Olímpicu de Tokiu nel entamu de la ceremonia inaugural.

Fonte noticia: Asturies.com: Entrerríos, María López y Carreño, la representación asturiana en Tokiu en busca de medaya

Asturies lleva a los Xuegos Olímpicos de Tokiu, qu’arranquen esti vienres, la menor representación de les últimes cites olímpiques. Raúl Entrerríos, en balonmano; María López, en ḥoquei yerba; y el debutante Pablo Carreño, en tenis, son los deportistes del país presentes en Xapón, toos con opciones de medaya reales.

Tokyo 2020, les Olimpiaes que van pasar a la historia por celebrase un añu depués por cuenta de la pandemia de COVID-19 que ximielgó al planeta nel 2020 –y sigue faciéndolo–, vive güei la ceremonia inaugural (13 hores, La 1), anque dellos deportes yá entamaron la competición. Va ser d’una manera triste, ensin públicu nes graes y evitando l’usu de la pallabra ‘celebración’, yá que nun hai nada que celebrar con miles de muertos diarios cola enfermedá causada pol coronavirus SARS-CoV-2.

Nesti contestu, trés asturianos van vivir el so suañu olímpicu, anque namái Carreño debuta nunos Xuegos. Son, amás del tenista xixonés, López y el pequeñu de los Entrerríos, bronce en Beijing 2008.

Los trés tienen opciones reales de medaya. L’equipu de balonmanu d’España, actual campeón d’Europa y algamó’l tercer puestu nel Mundial del añu pasáu, va tar encuadráu nel grupu con Francia, Noruega, Brasil, Arxentina y Alemaña, seleición cola que debutará mañana a les 16.15, hora llocal, 7 hores menos n’Asturies (9.15).

En ḥoquei yerba, el combináu español femenín, octavu en Rio 2016 con un bloque mui mozu, va buscar plaza pa cuartos de final con Australia, Xapón, China, Nueva Zelanda y Arxentina. El primer partíu va celebrase’l domingu a les 3 hores (10 hora llocal).

La estrena de Carreño, qu’aporta a Tokio llueu d’algamar n’Hamburg el mayor tornéu de la so carrera, un ATP 500, va estrenase nunes Olimipiaes mañana, nel cuartu partíu de la pista 1 del Parque de Tenis d’Ariake, contra l’estauxunidense Tennys Sandgrend, númberu 81 del ranking ATP. En dobles, onde compite xunto col andaluz Alejandro Davidovich, va vese les cares colos colombianos Juan Sebastián Cabal y Robert Farah nun horariu por confirmar.

Ensin medayes dende London 2012

La representación asturiana en Tokiu ye la más baxa en décades, con namái estos 3 representantes, llista a la que se podría sumar el palista Saúl Craviotto, residente nel país. En Rio foron 9, polos 8 de Londres, anque lloñe de los 18 qu’hebo en Barcelona 92.

Les últimes medayes p’Asturies aportaron nes Olimipiaes celebraes en suelu inglés, col oru d’Ángela Pumariega en clase Elliott 6m de vela xunto coles gallegues Tamara Echegoyen y Sofía Toro, y el bronce de Jessica Alonso cola seleición española de balonmano.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *