Publicado en Artículos, Música, Videoxuegos

Tever: «Gaita hero»

‘Gaita hero’, el tema de Tever que tamién ye un videoxuegu

Depués de ‘Fayendo’ y ‘Saltonggaeton’, Tever torna a soprender cola tercer pieza del EP ‘Fechu’n PLA’. Ye ‘Gaita hero’, un cantar que, amás d’una historia visual, como los dos anteriores, cuenta con una versión de videoxuegu arcade pa PC y dispositivos móviles.

“El mundu necesita un héroe nuevu pa ser salváu y equí ye onde te toca cumplir cola misión. Conviértete nel Gaita Hero que toos necesiten”, entama’l retu que presenta Tever. El rival, “un bichín”, la COVID-19, que lo “enllenó too: parques, escueles, cases, teatros, restaurantes, Congresu de los Diput…. (esto último non)”.

Poro, la misión del xuegu de plataformes va ser “finar con toos aquellos que veas nel to camín y lliberar al mundu d’esti bichín pesáu y molestu”. Asina, mientres suena’l cantar de fondu, y en dellos escenarios como paisaxes asturianos o una mina de carbón, el gaiteru deberá superar obstáculos y matar coronavirus hasta completar l’oxetivu final nel HUCA. Videu

‘Gaita hero’ ye la tercer propuesta del proyeutu del gaiteru Pablo Manuel Díaz García, nome real de Tever, nel que amiesta música tradicional y nueves teunoloxíes, y que va contar con seis histories visuales. Nesta ocasión, el gaiteru esperimenta con los soníos tan carauterísticos de los videoxuegos de la década de los 80 y primeros años de los 90.

Tever ye un gaiteru asturianu, maestru gaiteru ya inxenieru informáticu. Miembru de la Banda Gaites Camín de Fierro y autoproductor de los sos propios proyectos musicales. Como parte del so trabayu col desenvolvimientu informáticu, tien delles llínees de trabayu enfocaes a la docencia musical utilizando nueves tecnoloxíes.

‘Tever’, un maestru de la gaita que fusiona tradición y vanguardia
Fonte: RTPA 30 payares 2020

Ferramientes del nuestru tiempu al serviciu del espardimientu y caltenimientu de la tradicional musical. VER VIDEU

Pablo Manuel Díaz García, más conocíu como ‘Tever’, ye un maestru de gaita teberganu que lleva tola so carrera fusionando tradición y vanguardia.

Usando les nueves tecnoloxíes, desendolcó ferramientes pa dar clases interactives de gaita o de pianu, como un punteru de gaita fabricáu con una impresora 3D.

Ferramientes del nuestru tiempu al serviciu del espardimientu y caltenimientu de la tradición musical. Un oxetivu que Tever persigue tamién nunu de los sos últimos trabayos, un rexistru de los gaiteros de Proaza y Teberga que s’asoleyará nun llibru.

Profesor na Escuela de Música de los Valles del Osu, con formación como Inxenieru Informáticu, esti añu entamó la so carrera musical en solitario amestando’l soníu de la gaita col reguetón.

 

 

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *