El turismu internacional caltien l’enclín a l’alza n’Asturies en plena temporada baxa. El Principáu ganó barganal de 4.800 viaxeros nos dos primeros meses del añu en comparanza col mesmu períodu de 2023. D’ellos, casi la metá (46,35%) venía de otros países. El númberu de viaxeros estranxeros atropa una crecedera del 12% en xineru y febreru, los meses menos turísticos del añu.
Los establecimientos asturianos agospiaron nestos dos meses a 173.548 turistes, que xeneraron 331.284 pernoctaciones. Estos datos, publicaos güei pol Institutu Nacional d’Estadística (INE) suponen medríes del 3% y del 2%, respeutivamente, al respective de xineru y febreru de 2023.
Nel balance destaca l’emburrie de los hoteles, nos que s’agospiaron el 90% de los visitantes y que recibieron un 5% más de veceros.
L’INE nun apurre datos completos de campings y albergues nesta dómina, debíu al pequeñu tamañu de l’amuesa. Los apartamentos y los agospiamientos de turismu rural esperimentaron nesti periodu descensos del 10% y el 24%, respeutivamente, nel númberu de turistes, y del 8% y el 10% nel casu de les estancies.
