Publicado en Asturies, Viaxes

El Gobiernu quier coneutar l’aeropuertu con más países…

La sociedá pública Recrea entama un concursu pa coneutar l’Aeropuertu d’Asturies con cinco países europeos, amás de con Barcelona. Los llugares escoyíos pa contar con conexones aérees direutes tol añu hasta’l 2025 son Londres, Bruxeles, Milàn, Düsseldorf y Lisboa, cola posibilidá d’añadir otros destinos.

El Gobiernu destina 9,3 millones d’euros hasta’l 2025 pa la creación d’estes rutes áerees per aciu d’un contratu de promoción cultural y turística que permita la desestacionalición de la llegada de turistes a Asturies. Según espliquen, estes ciudaes de cinco países europeos escoyéronse en función de los datos históricos de pasaxeros esistentes.

Les empreses interesaes tienen hasta’l 8 d’ochobre pa presentar les sos ufiertes, polo que les rutes nueves activaríense pa la campaña de branu del añu viniente, qu’entama’l 27 de marzu. D’esta forma Asturies coneutaríase otra vuelta con Inglaterra, última ruta internacional esistente, amás de con Bélxica, Italia, Alemañana y Portugal.

Anguaño Asturies tien 14 conexones, nenguna fuera del Estáu. Pal iviernu van dexar de funcionar les d’Eivissa, Menorca y Murcia, mentes que van caltenese les de Madrid, Barcelona, València, Málaga, Alacant, Sevilla, Mallorca, Tenerife Norte, Tenerife Sur, Gran Canaria y Lanzarote.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *