‘Animalada Xabaz’ vuelve esti sábadu a la TPA. L’espaciu infantil utiliza l’asturianu y el gallego-asturianu como llingües vehiculares.
TPA va reponer dende esti sábadu 14 de xineru l’espaciu infantil ‘Animalada Xabaz’, que se va emitir toles mañanes de los sábados a les 09.15 hores. El programa tien ocho capítulos y l’asturianu y el gallego-asturianu como llingües vehiculares.
‘Animalada Xabaz’ ye una idea del actor Carlos Alba ‘Cellero’ y ta producida por Covenant Audiovisuales dientro de la convocatoria de la Conseyería de Cultura para promocionar l’asturianu y el gallego-asturianu en RTPA.
Nel espaciu, la cabra Telva, el xabalín Xuacu y l’osa Sabela van ver a Cellero y la so fía Fefa para escuchar cuentos. Per otru llau, Enol quier aprender asturianu y el Pola y el Gallu empiecen col rock. Anque delles vegaes el trasgu Nalón tracamundia tolos planes. Asina, l’espaciu suma la divulgación, los moñecos, la música y los cuentacuentos para entretener a la infancia al empar que se promociona’l patrimoniu llingüísticu asturianu.
