La conseyera d’Educación, Lydia Espina, asistió güei en Cualloto al actu institucional de cambéu de nome del colexu públicu del barriu uvieín, que va pasar a denominase CP José Luis Capitán-Cualloto, n’homenaxe a un antiguu profesor del centru y destacáu atleta, quien sufre una esclerosis llateral amiotrófica (ELA). El colexu fixo coincidir l’actu col día mundial de la llucha contra esta enfermedá.
L’actu consistió n’una carrera solidaria, un baille protagonizáu pol alumnáu y el descubrimientu d’una placa. El momentu más emotivu foi cuando ‘Capi’, como se-y conoz popularmente, dirixióse a los presentes por aciu una interfaz para remembrar la so trayectoria profesional y estimar el sofitu diariu de la so muyer, Teresa Pérez, y los sos trés fíos y de tola comunidá.
Tamién aprovechó para defender la escuela pública.
La conseyera reconoció tar “bien emocionada” pol actu y amosóse “arguyosa de lo que signifiquen los maestros vocacionales, como ‘Capi’, que ponen el so granín d’arena para ayudar nel futuru a ser meyores persones y trabayen para caltener los valores”. Y mentó la superación frente a l’adversidá, la solidaridá o l’arrogancia como dalgunos d’esos valores qu’encarna’l protagonista. Espina emponderó la vida de ‘Capi’ dedicada a la docencia, al deporte y a la so familia, lo que-y fixo merecedor de llevar el nome d’esti colexu, una reconocencia “que va quedar para siempres”. Tamién destacó’l so activismu para ayudar na investigación contra esta enfermedá.
A lo último, la conseyera estimó’l llabor de la comunidá educativa del colexu, encabezada pola directora, Ana Cuetos, y el claustru, según a les families, deportistes y vecinderu qu’allegaron a arropar al homenaxáu, amás de la presencia de la conceyala d’Educación d’Uviéu, Lourdes García.
