Publicado en Curiosidaes, Flores

Científicos aliquen una planta del Pleistocenu, a partir d’unes granes de fai 32.000 años

Esta planta que ves na semeya ye’l ser vivu más vieyu de la Tierra. Tien más de 32.000 años. Y ye un milagru de la Naturaleza, y de la Ciencia.

Va unes selmanes falamos de la resurrección de la Palmera de Judea, estinta dende los tiempos de Xesucristo, pero que volviera a la vida gracies a unes granes de fai 2.000 años.

Yera la planta más antigua que se consiguiera recuperar, pero agora esos milenios quedaron en nada cuando contemplamos a una Silene stenophylla que tien 32.000 años.

Les sos granes provienen del Pleistocenu, cuando los mamuts, l’osu de los covarones o los neandertales, entá caminaben sobro la cara de la Tierra.

Planta del Pleistocenu

Al contrariu que la mentada Palmera de Judea, la Silene stenophylla nun ye xuna planta estinta. Entá esiste na actualidá, anque solo crez na zona nororiental de Siberia.

Pero estos exemplares de fai 32.000 años son distintos: los petálos son más llargos, y crecen más espaciados. Nun sufrieron los milenios d’evolución de les sos conxéneres modernes.

Tou empezó en 2007, cuando un equipu internacional de botánicos afayó 600.000 granes conxelaes nel permafrost de Siberia.

Estes granes fueren almacenaes por esguiles de fai miles d’años, pero xuna hinchente o otru eventu climáticu soterroles nel permafrost al poco de ser recoyíes, asina que se conxelaron darréu.

Los botánicos de l’Academia de Ciencies de Rusia dedicaron años a estudiales y catalogales. Un grupu d’estes granes pertenecíen a la especie Silene stenophylla, y la datación por radiocarbonu otorgó-yos xuna edá d’ente 20.000 y 40.000 años: nacieron nel Pleistocenu.

Los científicos intentaron granar delles granes madures, tres desconxelales, pero nun lo llograron. Asina que lo que fixeron foi cultivar plantes adultes a partir de texíu placentario.

Asina consiguieron alicar a 36 especímenes que yá producieron los sos propios frutos y granes. Y amás son más fértiles que les sos descendientes modernes. El 100% de les sos granes granen, frente al 90% de les actuales.

Los mesmos científicos esclarien que bien poques granes antigües pueden alicar asina. Nesti casu coincidieron dos sucesos estraordinarios, más allá de la perfecta conxelación de les granes.

Per un sitiu, trátase d’una planta que contien muncha sacarosa, qu’actuó como conservante. Por otru, la radiación gamma que xenera de forma natural la tierra y destrúi l’ADN, yera estrañamente baxa na zona, y por eso la capacidá rexenerativa de la planta caltúvose mientres 32.000 años.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *