El Conceyu entamó un ampliu programa festivu con actividaes para tolos públicos. Al envís de homenaxar al campu y a les sos xentes, un añu más, Uviéu celebra la Feria de L’Ascensión, del 19-21 de mayu, unu de los certames ganaderos más importantes d’Asturies.
Mercaos, conciertos, talleres, la segunda edición del Concursu de ganáu «Ciudá d’Uviéu», l’homenaxe al Paisanu y Paisana del añu o’l Desfile Folclóricu formen parte d’un estensu programa d’actividaes que puedes consultar equí.
Para ello, la capital asturiana esplega en plena primavera tol so arsenal para cuntar con un gran programa festivu onde los mercadinos y el concursu de ganáu acopen tol protagonismu. Nesta fiesta, que foi declarada d’interés turísticu rexonal, nun falten tampoco les esposiciones, les actuaciones musicales y les actividaes infantiles ambientaes na tradición asturiana. Una cita que nesta ocasión va tener llugar los díes 19, 20 y 21 de mayu na ciudá.
Vienres, 19
El pistoletazu de salida d’esta popular fiesta que los sos entamos remóntase al sieglu XVI va dala la Real Banda de Gaites Ciudad d’Uviéu. L’afamáu grupu va actuar a les 11.00 hores del vienres 19 para inaugurar la feria. Momentu nel que se va abrir el mercáu asitiáu pela redolada de la catedral y dedicáu a la vienta y esposición de quesos y productos agroalimentarios, según el del Paséu del Bombé, onde los artesanos van dar rienda suelta a la so imaxinación y van amosar a los asistentes la so maña coles manos.
