El ránking de la OAD inclúi na posición 32 a esti popular establecimientu de la rexón y publica un llistáu de «bien recomendables» qu’inclúi a otros trés asturianos. Casa Marcial sigui collechando ésitos, tamién a nivel européu.
El ránking de la OAD (Opinionated About Dining) inclúi’l restorán de los hermanos Esther y Nachu Manzano ente los 150 meyores d’Europa. Nun ye la primer vegada que l’establecimientu de Les Arriondes (Parres) apaez nesta guía na que predominen nomes españoles, cuidao que nes trés ediciones anteriores tuvo presente en distintes posiciones. Nel 2023 llogró asitiase ente los 50 meyores restoranes del continente, ocupando concretamente’l puestu númberu 32.
Esta reconocencia súmase a la llarga llista de trunfos del restorán más galardonáu d’Asturies, que cunta con dos estrelles Michelin y trés soles Repsol. Este mesmu añu, les opiniones de los comensales asitiaron a Casa Marcial como’l restorán meyor valoráu d’España. Ye’l buque insinia de los hermanos Pumar, qu’estendieron la so cocina por otros puntos de la rexón con distintos conceutos como Gloria, Nastura o NM, la xoya cola que pretenden siguir aumentando’l so universu d’estrelles Michelin.
«Casa Marcial vionos caciplar nos fogones de la nuesa madre; equí aprendimos del nuesu padre’l valor de la hospitalidá, del serviciu y del prestu de convertir a clientes n’amigos. Les nueses güeles mandáronnos les recetes y l’amor pola cocina y los nuesos padres imprimiéronnos el respetu pola naturaleza y polos productores locales», definen na so páxina web. D’esa descripción naz xuna carta basada nos menúes degustación qu’inclúi productos de cercanía y qu’entemez innovación y alta cocina con recetes tradicionales que se convirtieron n’imprescindibles, como les croquetes de xamón, l’arroz con pitu de caleya o la fabada.
Arroz con pitu de Caleya, Fabada Asturiana a la manera tradicional, Rei al caricote y Chuletón del mar Cantábricu. Estos son los catorce platos asturianos encamentaos polos meyores chefs d’España
Nel top 150 de meyores restoranes europeos de la OAD pal 2023, los hermanos Esther y Nachu ocupen la posición númberu 32 d’un ránking qu’encabeza de nuevu’l restorán Alchemist, de Rasmus Munk en Copenhague. El primer español ye Etxebarri, que s’asitia nel tercer puestu, ente que ente los diez meyor asitiaos, cuatro son del país.
Otros trés asturianos, ente los bien recomendables
Xuntu al ránking de los 150 meyores restoranes d’Europa, la OAD publica un llistáu d’establecimientos bien recomendables y otru, d’encamentaos. Ente los primeres, qu’identifica coles sigles HR, de «Highly Recommended», pueden atopase hasta trés asturianos. Son #Casa Gerardo en Priendes, encabezáu pol chef Marcu Morán y que cunta con una estrella Michelin y trés soles Repsol; La Huertona en Ribesella, encabezáu por Rosa Ruisánchez y José Manuel Viejo y con dos soles Repsol, y el Real Balneariu de Salinas, con Isaac Loya al frente y que caltien xuna estrella y dos soles.
