Publicado en Entrevistes

Entrevista a Berto Suárez, creador de ‘Indumentaria’ y el dia’l traxe’l país

«Facer bien los traxes ye como l’intentar ver a lus nuestrus antepasaos per un furaquín».

«Celebrar el Concursu Indumentaria ya’l vistir el traxe’l país ya algo que caló na xente de Grau, tiénenlo a gala».
Fonte: La Voz del Trubia.
Beatriz Álvarez/ Grau

Berto Suárez ye el creador de ‘Indumentaria’ y el dia’l traxe’l país, que llogró alzar la recuperación de los traxes tradicionales asturianos con un procesu de documentación rigorosu, y creó una de les fiestes más especiales d’Asturies, con la complicidá del conceyu de Grau.

.¿D’aú te vien l’afición o la curiosidá por esti mundu que ya un mundu que te lleva muncho más p’allá d’una indumentaria (historia de los traxes, de las personas que lus vistían, del status social, etc)? Ye un auténticu retratu de la sociedá de la época ¿Cómo sal de ti esi trabayu d’investigación ya estudiu? Porque como me dicía Ambás «nada más apartao del folclorismu rancio, esto ye una cosa mui seria».

-Si quiás reproducir bien la vestimenta d’una época tienes que documentati, conocer la bibliografía, lus estudius que tan publicaus sobre esti tema. Y buscando datos aprendí muncho sobre’l contestu social ya económicu de la época.

-¿Cómo t’engancha esta historia? ¿Cuál foi’l primer traxe que tuviste?

-De rapacín yá a mi me prestaba la cultura, la etnografía y la llingua asturiana comu espresión natural de lo que somos, comu esplicación del mundu que you vía mientras gozaba pul verano nuna casa qu’arrendaramos en L’Outeiru de Candamu. Yo mamé l’asturianu en casa, n’Uviéu, ya en Candamo. Siempri quixi tener un traxe’l país ya al encargar el primeiru –cuando yá yera un paisanu–, empecéi a interesami por esti tema ya enganchóume. Ya fascinante. Ya como l’intentar ver a lus nuestrus antepasaos per un furaquín. Ya cuanto más quiero ver más m’engancha. El mio primer traxe ya de pañu, con calzón pardu, xilecu verde ya chamarra color caldera.

-¿Cómo se t’ocurre «El día’l traxe’l país»? ¿naz dende un principiu como algo a institucionalizar?

-Al vivir el procesu d’encargar un traxe, dime cuonta que las pautas pa faer un traxe bien documentao son distintas de las d’unu que nun lo ta tanto. Y paecíame una pena que más xenti nun intentara faer las cousas bien, igual por desconucimientu. Porque la ilusión ya el sentimientu tiénenlu igual tolas personas que cuesen y vistin un traxe, pero el resultáu, el corte, los materialis, los detallis son munchas veces bien diferentis. Ya decidí qu’había que faer un Concursu pa distinguir esos traxes meyor documentaos: pa poner esus procesus en valor. Y desde un primer momentu consideré que tinía que ser algo abierto al públicu, a la participación de tol mundu, apoyao por una institución.

-Yá nun s’entiende sin Grau, ¿cómu se t’ocurrió abrir esti frente? Y ¿cómo foi que Grau t’abrió la puerta? ¿tú crees que notros sitios te dixeron que non porque hai xente que cree que esto ye algo pouco seriu (muncha xente asócialo con disfrazase y nada más apartao d’eso)? ¿qué papel desempeñaron los conceyales Plácido y Elsa nel primer momentu? Ya güei ¿qué papel desempeña l’Ayuntamientu de Grau?

-Toi mui contentu porque’l celebrar el Concursu Indumentaria ya’l vistir el traxe’l país ya algo que caló na xente de Grau, tiénenlo a gala. Ye un elementu de distinción únicu. You andaba buscando una institución qu’apoyare el mio proyectu, allá pol 2015, y acabé solicitando una entrevista a Elsa Suárez, porque yera la persona que tinía la responsabilidá de gobiernu nel área de festexos. Daquella Plácido Rodríguez taba en Cultura. You nun lus conocía, pero de mano entendieron que yera un proyectu bonu pa Grau desde un puntu de vista cultural, turísticu ya económicu. Ya dixéronme que nun ficiera más xestiones pur outrus llaos. El proyectu yá gustara n’Uviéu, pero echáranse las elecciones enriba ya nun pudían contratallo y you taba pendiente de la corporación nuova. Elsa ya Plácido adelantáronsi a Uviéu. Yá llevou seis años faéndolu en Grau, que ya la institución que lo financia xunto con Caja Rural d’Asturias. No demás nun intervienen en nada. You dirixo, organizo y ofrezo’l Concursu Indumentaria fecho hasta nel últimu detalle, volcáu nel rigor y notra clave perimportante: la independencia del xuráu. Pero lus dos apoyaron el Concursu siempre, (Plácido hasta concursó en dexando de ser conceyal) y eso pa mi foi mui importante porque supieron delegar y dexame trabayar. Ya tuvi d’ellos, y del personal del Ayuntamientu, tola collaboración que necesité. Si nun se fexo n’outru sitiu nun foi porque lo vieran cousa pouco seria o de disfraces.

 –Combinar tradición ya xuventú nun parez fácil nesti mundu que nos toca ¿Cómo s’atrai a la mocedá a esti tarrén? amás, el domingu, había muncha xente xoven concursandu ya nel baille, vistíos colus traxes (dixéranmelo pero nun yera a creyelo)

-De mozos, igual que a cualquier edá, tenemos ganas de divirtinos. Caún encuentra la  divirsión a so manera. La cantidá de xente mozo que disfruta del baille tradicional nesti momento n’Asturias ye tremenda. Gústa-yos y nun lo tienen a mengua, tolo contrario, ¿porque van tenello? La cultura tradicional pasó del despreciu al estudiu y agora vuelve al pueblu, a la sociedá, pa cumplir el papel de diversión que siempre tuvo ensin folclorismos. Baillan de vaqueros ya baillan cul traxe’l país, nun tienen complexos.

-¿Hai una industria alredor del traxe? ¿hai xente especializao? ¿podía haber más? ¿hai campu pa una actividá económica potente?

Hai un sector que sufrió muncho cola pandemia, pero hailo. Y hai establecimientos mui especializaos nesti tema. ¿Si hai campo pa medrar? Nun ye’l mio campo, porque yo trabayo en diseñu y comunicación, pero pienso que pasará lo mesmo que con cualquier actividá económica, que se regulará pula ufierta y la demanda. Si hai más demanda habrá más xente cusiendo. Pa mi, lo importante nun ya qu’haiga munchos traxes sinon traxes bien fechos. Si hai muncha demanda van vendese hasta nos chinos (ya entós si que van paecer disfraces), pero eso nun ye lo que queremos. Faer un bon traxe rique conocimientos, tiempu ya capital, nun ye una inversión pequeña. Lo que nos tien que distinguir ye faer las cousas bien. Ya pura artesanía ya alta custura, en munchos casos.

-¿Cómu valoras esta iniciativa? el domingu salieron mensaxes interesantes: fiesta d’interés turísticu, consolidarla con independencia de la sensibilidá que gobierne Grau, Muséu del traxe…
-You voi siguir trabayando y cuento faer el Concursu Indumentaria 2023 ya vou d’añu n’añu. Las declaraciones d’interés turístu tán bien pero tuvía nun se cumplieron diez ediciones, ya prontu pa esu. Sería buono siguir en Grau pero eso nun depende de mi, depende de la xente de Grau y de los gobiernos futuros. Grau apostóu por Indumentaria ya Indumentaria apuosta por Grau, pero si en Grau nun quieren you cuento siguir faéndolo. Despuós de tol trabayu fechu nun creo que-y falten novias al Concursu. Y sobre’l Museu del Traxe’l País, ye una necesidá más qu’evidente. Y puede tar en Grau. Y si se fai con rigor siempre me van tener audando.

-Mirando p’atrás ¿qué cambió dende la primer edición hasta agora?
Pamidea el concurso ta cumpliendo colos fines: volver a las fontes, al sieglu XIX, y divulgalas pa conseguir vistinos meyor, poner en valor la nuestra identidá y la nuestra roupa, recuperar l’usu de piezas como las madreñas d’escarpín, contener los escesos y volver a una indumentaria austera ya elegante que yo pienso que ya lo que nos identifica como asturianos. You, tolos años, miro pa lus traxes que llevan las distinciones ya estudio a ver qué nus quiar dicir el xuráu con esi premiu.

-Mirando pal futuru ¿qué retos abordáis?
Tenemos dellos retos puramente materiales. Hai que consiguir texíos de llinu y llana naturales 100%, hai que consiguir personas que sepan texer medias, faer madreñas d’escarpín, etc, porque acábansi las personas que sabían ya con ellus marcha esa sabiduría ya nun hai relevu. D’outra manera, ya importante que más personas descubran la pasión pola indumentaria, el sentimiento únicu que ya’l vistise d’asturianu con un traxe bien documentáu, curtáu, cusíu y vistíu. Y medrar despacio. La prisa ya malísima, mineña. Por faer un traxe en cuatro días nin s’estudian las piezas antiguas, nin se repara: gárrase cualquier tela y cuésese de cualquier manera y cálzanse unas alpargatas o unas madreñas de zapatiya. Ya eso nun ya. Tenemos que medrar despacio. La nuestra ya una fiesta de tamañu medianu. Cualquier cousa «macro» acaba cula calidá ya’l rigor, ya acaba cula fiesta mesma. Na indumentaria tradicional de calidá nun valin los atayos. Cuser un puñu una camisa tou plegadín lleva lu que lleva. Ya también ya un placer. Faer cousas sin priesa ya un gran placer. Ya las cousas bien fechas quieren tiempu.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *