Publicado en Reciclaxe

La Vuelta más sostenible llega a Asturies

En pasando pelos Llagos de Cuadonga y l’Altu d’El Gamoniteiru, el Pelotón Verde d’Ecovidrio va llimpiar los residuos y va lluchar contra l’abandonu de refugaya nel mediu natural

Asturies va rellumar na Vuelta a España dende güei hasta’l xueves próximu. Na edición d’anguaño, amás de los ciclistes el protagonista va ser el Pelotón Verde, integráu por voluntarios ambientales d’Ecovidrio que, en rematando la etapa en Llagos de Cuadonga (1 de setiembre) y Altu d’El Gamoniteiru (2 de setiembre) va encargase de llimpiar los residuos que se xeneraren pa caltener el medioambiente llimpiu. Nes ediciones anteriores, los más de 200 voluntarios que pasaron pol programa recoyeron los residuos nes zones de mayor sensibilidá medioambiental poles que trescurría’l percorríu. Anguaño amplíase’l so llabor a tol percorríu, polo que van actuar en rematando caúna de les 21 etapes d’esta edición de La Vuelta.

Como n’ediciones anteriores, Ecovidrio va instalar contenedores personalizaos con imáxenes de la campaña nos conceyos pelos que pasa La Vuelta. Los residuos de vidru que se recueyan nesos contenedores van ser utilizaos pa la realización de los trofeos de ganador d’etapa que van llevantar los corredores vencedores.

Otra de les grandes novedaes d’anguaño va ser la instalación d’Eco Zones o árees de recoyida de refugaya pa los corredores, acordies cola normativa ciclista nueva. Ecovidrio va patrocinar estos espacios y va poner a disposición de los deportistes ente seis y siete puntos quilométricos a lo llargo de cada etapa en llinia pa que depositen los residuos. Ún de los oxetivos d’esta edición ye que los corredores sigan asumiendo como propia la responsabilidá col entornu y prueba d’ello ye’l patrociniu d’estos puntos que, si antes yá yeren utilizaos de manera xeneralizada, anguaño van selo con mayor razón pa evitar posibles sanciones.

Asturies, una comunidá comprometida cola sostenibilidá

Según los últimos datos relativos a 2020, los asturianos reciclaron un total de 17.260 tonelaes de vidru, una media de 16,9 quilos per habitante. La comunidá yá cunta con 4.763 contenedores de vidru, lo que se traduz a una media de 214 habitantes per contenedor.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *