El muséu asturianu que ta a puntu d’algamar los 2.500.000 visites cunta con más de 520 pieces d´icnitas, según cadarmes completes y restos óseos vos de distintos animales prehistóricos.
- Web MUXA: Muséu del Xurásicu d´Asturies
Enclaváu a lo cimero d’un cantil de la mariña del Mar Cantábricu, nel conceyu de Colunga, el Muséu del Xurásicu d’Asturies (MUJA), alluga la colección más completa de buelgues de dinosaurios d’Europa y la tercera del mundu, y al cumplise’l decimoséptimu aniversariu de la so creación ta a puntu d’algamar los 2.500.000 visitantes.
El MUJA recibiera hasta finales de febreru 2.468.580 visites desque abrió les sos puertes al públicu’l 1 d’abril de 2004, momentu nel que se convirtió nun referente para la divulgación de la evolución de la vida nel planeta, dende les cianobacterias marines hasta la desapaición de los grandes vertebraos fai 66 millones d’años.
La pandemia de coronavirus torgó que’l pasáu añu 2020 pudiera recibise al visitante númberu 2.500.000, anque a pesar de les restricciones sanitaries tuvo «cifres bien positives» con «un branu bien bonu» nel qu’hubo «xornaes d’aforu completu», informó a EFE la coordinadora del muséu, Marta Molleda.
La mayor parte de los visitantes, un 73,89%, son d’orixe español, principalmente de Madrid, Castiella y Llión y Galicia, un 22,4% son de les principales ciudaes d’Asturies y el 1,62% son estranxeros, franceses, alemanes ya ingleses.
Con más de 520 pieces, la colección d´icnitas, buelgues de dinosaurios, del MUJA foi considerada la «meyor» de los museos d’Europa y la tercera del mundu por detrás de la del Dinosaur Tracks Museum y de la del Beneski Museum of Natural History, d’Estaos Xuníos.
El paleontólogu galés Martin Lockley, unu de los espertos de mayor prestíu na busca y estudiu de buelgues de fósiles vertebraos, dixo que la colección del Xurásicu cimeru que puede vese nel MUJA «ye la más importante del mundu d’esa dómina».
El Xurásicu cimeru, que toma un periodu qu’empezó fai 201 millones d’años y acabó fai 145 millones d’años, caracterizáu pola hexemonía de los grandes dinosaurios y l’entamu de la separación de los continentes, conozse como la edá de los zoorópodos, brontosauriu y estegosauriu.
«Nun hai tantos exemplares d’estos dos dinosaurios n’otros periodos, la colección de buelgues d’Asturies ye bien impresionante ya importante pola cantidá de pieces que contien», afirmó’l científicu galés.
Nel MUJA pueden vese les mayores buelgues de terópodos y estegosaurios conocíes hasta’l momentu, les cadarmes más completes de los reptiles marinos ictiosauriu y plesiosauriu de la península Ibérica, parte d’una cadarma d’un dinosauriu ornitópodo y restos óseos vos de tortúes, cocodrilos y peces.
En delles de les roques topaes na llamada mariña de los dinosaurios, que s’estiende dende Xixón hasta Ribeseya, recuperaes pol equipu científicu del muséu, pueden reparase marques de la piel de los dinosaurios.
Y ye que la mariña asturiana nun yera esa sucesión de pequenes sableres de sable ente cantiles predresos qu’hai na actualidá, sinón unos terrenes baxos y blandios nos que los grandes animales prehistóricos dexaben los sos rastros. A la fin de la era Paleozoica, Asturies nun yera un territoriu de mariña porque ocupaba’l centru de la tierra, nel mediu d’un únicu continente, Pangea, que se quebró y dio llugar al mundu tal que lu conocemos.
L’equipu d’investigación del MUJA, formáu polos xeólogos José Carlos García-Ramos y Laura Piñuela, continua la busca de buelgues nos cantiles de la mariña asturiana y cientos d’estes amueses atopen pal so estudiu nel sosuelu del muséu.
García-Ramos y Piñuela collaboren con 47 especialistes d’estaos Xuníos, Canadá, Xapón y Arxentina y nos dos últimos años participaron na escavación, preparación y estudiu de dellos xacimientos de buelgues de dinosaurios nes provincies de Chongping y Gansu, en China, informa Efe.
