SMRA. 20.01.21.
La Conceyalía de Cultural de Samartín del Rei Aurelio tradució al asturianu’l portal web municipal smra.org compuestu por conteníos fixos con información sobro los servicios públicos y el funcionamientu de la institución según por noticies d’actualidá municipal.
El procesu de traducción de la web al asturianu «nun ye concluyente sinón que va siguir nel tiempu pos tien qu’entendese nel marcu del tresformamientu dinámicu del propiu portal web, nel que se revisen, anueven ya incorporen conteníos dacuando», esplicó la concejala de Cultura, María Alonso. Con esti llabor «pretendemos normalizar, potenciar y fomentar l’usu del asturianu ente la población del conceyu», argumentó la edil.
L’accesu a los conteníos n’asturianos ye bien senciellu y actívase clicando na bandera d’Asturies qu’apaez na parte cimera esquierda del portal web na dirección smra.org tanto si la conexón realizase dende un ordenador como dende un dispositivu móvil o táblet.
A partir d’ehí, tantu los conteníos de les diferentes estayes que s’organiza el portal web como’l bloque de noticies qu’aparez de manera destacada na portada van poder lleese en llingua asturiana; inda non nel portal de tresparencia, entá en procesu de dotación de conteníos, que va entamase nuna siguiente fase.
La traducción del portal web al asturianu iguóse con recursos propios y personal municipal, y nun acarrió nengún coste.
