Publicado en Alimentos, Empreses

Una granxa de pites de lo más remangosa

Noelia García ente les sos pites, criaes al campu y con música.
Testu y semeya: Elena Plaza

‘Pitasana’: el proyectu alternativu de granxa de güevu ecolóxicu qu’impulsaron Noelia García y Pablo Vélez

Dexó’l mundu del teatru, en concretu como técnica de llume, y volvió pal pueblu con tol remangu del que faía gala. Noelia García Fernández, xuntu con Pablo Vélez Fernández, montó Pitasana, una granxa de güevu ecolóxicu que cunta siete años de vida a los sos llombos allugada n’Armal (Bual). Dambos formen un tándem nel que se complementen a base de veces y necesidaes marcaes poles estaciones del añu. Gústa-yos pensar qu’hai otra manera de faer, de vivir, d’alimentase, y para ello trabayen dende esti alloñáu cachu de tierra, y lléase alloñáu en tonu reivindicativu, porque nel so proyectu hai enforma de reivindicación.

Ye la reivindicación polo d’antes afechu a los nuevos tiempos; ye la reivindicación por protexer árees despoblaes, alloñaes de los centros, que s’escapen pelos marxes; ye la reivindicación pola visibilización de lo rural, de les muyeres del rural, de la cultura no rural. Ye la reivindicación de que lo alloñao siempres depende de la perspectiva de quien mira. De cuenta que ye’l centru lo que tamién ta alloñáu.

Pablo Vélez y Noelia García, l’alma de Pitasana. Semeya: Elena Plaza

“Unu de los hándicaps d’entamar nel occidente d’Asturies ye que ye distancia: tienen que percorrer pa vender los güevos nel centru, tamién cuando tien que llegar mercancíes, cartones, envases… suelen tardar más en llegar. La tema d’entamar nel mundu rural, cuando ye rural de verdá y ta aislláu, alloñáu de la zona central, que ye onde ta tou n’Asturies a la fin, siempres tien un valor añedíu pola valentía d’entamar nesta zona y un valor añedíu económicu pol esfuerzu que trai sacar el productu d’esta zona y llevalo hasta’l centru, l’oriente o onde vaiga”, reafítase Noelia que, cansada del ritmu frenéticu del so anterior oficiu, apostó por volver al so orixe.

Hasta Armal vien muncha xente del centru, diz, pero tamién hai otra que nun llega hasta esti conceyu “por tar nel occidente porque-yos paez una zona alloñada. Y a la fin ye’l mesmu percorríu del centru a Llanes que del centru equí, pero a nivel psicolóxicu dende’l centru tiéndese a tirar escontra oriente o interior y l’occidente ta, por dalguna razón, más alloñáu mentalmente”. Les distancies psicolóxiques, al igual que’l tiempu psicolóxicu, tien muncho más peso que’l real.

Vienden güevos n’ecolóxicu y tamién parte de la so propia producción, “cultivamos un pocu más de lo que consumimos al añu. La güerta da pal nuesu autoconsumu y los escedentes véndense en vienta directa na granxa a les visites que vienen”. Complementen cola actividá de granxa escuela y talleres na naturaleza, anque cunten qu’esta dómina covid tamién los afectó.

Tola producción ye a pequena escala y los güevos véndense solo n’Asturies, bien en locales o a les visites que reciben. Destaca que se trata d’una granxa biodiversa, con diversidá de cultivos y d’espacios, que produz de manera sostenible n’ecolóxicu pero que tien que convivir cola normativa pa granxes industriales, éses que tienen 20.000 pites atarraquitaes en xaules. “Tienen la mesma normativa qu’una granxa artesana ecolóxica que procede totalmente distinta col mediu ambiente y colos animales. Nós somos autosuficientes tocantes a eletricidá, con plaques solares y bateríes. Nun tendría de ser la mesma normativa pa les grandes industries pensaes p’abastecer ciudaes que pa les pequenes granxes diverses que pueda haber n’Asturies, granxes artesanes qu’abastecen a la zona local y que respeten y curien en tou momentu’l mediu ambiente y la redolada y arriquecen la zona rural”.

Si’l proyectu nun ye más rentable en parte ye pola visión consumista esistente na sociedá, con productos, que non alimentos, baratos pol costu industrial p’alimentar a muncha xente. En parte tamién pola llimitación que supon la normativa, “pensada pa la industria, pa un tipu d’alimentación pensao p’abastecer ciudaes y que tou sía grande y baratu. Ende nun entramos les granxes locales y diversu”.

Packaging de media docena de güevos. Semeya: Elena Plaza

Noelia ye una polvorilla coles coses clares, asina que dende COPAE, el sellu de garantía de producción ecolóxica nel que tamién participa, llanzaron una propuesta a la Conseyería de Mediu Rural pa diseñar una figura de producción de granxa artesana que suponga, per otra parte, el caltenimientu de los caseríos asturianos “que siempres esistieron y que, últimamente por culpa de les normatives, cada vez-yos cuésta-yos más tener un proyectu d’esti tipu”.

“N’otres comunidaes yá se ta empezando a trabayar nesto. Por casu en Galicia yá tienen la figura de granxa avícola artesana na que pueden tener pites pa criar, pollos… N’Asturies sería bien interesante tamién pa protexer al pitu caleya. Los gallegos tamién tienen activada la cooperativa formada por dos persones, daqué que pa llugares desfavorecios o de poca población ta xenial pa fomentar el cooperativismu”, rellata metanes un torbolín d’idees y proyectos. Pero toos ellos asitiaos y estudiaos.

Fala tamién d’otra figura, la SPG (Sistema Participativu de Garantía), en funcionamientu yá en munches comunidaes del estáu. “Ye un sistema d’autocontrol nel que la mesma organización xestiona la producción n’ecolóxicu, faciendo visites y controles a les granxes, y faciendo vienta directa. Básase nel enfotu ente productores y veceru final y la collaboración mutua ente toos los productores. Cada SPG tien distintes sinergies: por casu la de Galicia ta en Llugo y tienen un mercáu onde van vender tolos sos productores. Depués hai distintes organizaciones colaboratives dientro d’esti sistema que resulten bien interesantes pa les zones rurales y esti tipu d’agricultura”, esplica.

Una de les naves col mural de Pitafesta. Al fondu Bual. Semeya: Elena Plaza

Valientes entamadores

“L´emprendimientu nun ta fechu pa toles persones nin toles persones tendríen de llanzase al emprendimientu porque ye una carrera de resistencia y de trabayar tolos díes enforma, d’enfrentate con titanes pa los que nun tienes ferramientes nin conocencies pa poder superalos. Ye difícil, bien difícil”, se sincera. “L´emprendimientu ye una ferramienta que muncha xente cueye porque nun-y queda otra opción, de xuru, pero nun ye un camín senciellu nin que se deba tomar a lo llixero”.

Ye consciente de qu’el covid modificó’l pensamientu mientres la pandemia de forma intensa, “pero dempués baxó toa esa intensidá y agora viennos xente a la granxa dende otres comunidaes cola idea de vivir nuna casa nel campu, más cercanos a la naturaleza. En realidá sirvió pa reforzar a los que yá pensaben asina”.

Nel so casu y el de Pablo tienlo claro porque queríen vivir nel mundu rural, faer un proyectu familiar onde poder criar al so fíu Xurde, que comparte años y esperiencia vital cola granxa. Dende’l principiu tuvieron claro la diversificación de la granxa, d’ende que tamién entamen actividaes pa colexos, pero tamién lleven a cabu un claru apueste pola cultura.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *