- RTPA: Dos campamentos romanos de Bual yá formen parte del Inventariu de Patrimoniu
- Fonte: Astures.es / Inventariu de Patrimoniu Cultural d’Asturies /
Fueron afayaos en 2010 gracies a imáxenes de satélite.
Mapa de situación de los campamentos. (Menéndez Blanco et alii, 2013)
L’Inventariu de Patrimoniu Cultural d’Asturies tien dos nuevos xacimientos arqueolóxicos. Son los campamentos romanos de campaña d’El Chao de Carrubeiro y A Pedra Dereta, nel conceyu Bual. El BOE de güei recueye’l resolvimientu final que va dexar protexer estos espacios, que fueron afayaos nel añu 2010 gracies a les imáxenes satélites y aérees y tán allugaos na llinia de cumes del cordal de Penouta.
- Chao de Carrugueiro: web / imaxe /
- A Pedra Dereta: web / imaxe /
La Conseyería de Cultura rexistró oficialmente la esistencia de dos campamentos romanos en Boal. Denominaos Chao de Carrugueiro y A Pedra Dereta, dambos van pasar a formar parte del Inventariu de Patrimoniu Cultural d’Asturies na categoría de Xacimientu Arqueolóxicu Inventariáu. El Boletín Oficial del Principáu d’Asturies (BOPA) sacó a información pública los espedientes na so edición de güei.
Dos nuevos campamentos romanos en Bual: el Chao de Carrugueiro.
Esti elementu arqueolóxicu identificáu por aciu l’analís d’imaxes satelitales y aérees na sierra de Penouta, al altor de la localidá de Carrugueiro, a escasos kilómetros de la capital del conceyu occidental de Bual. De planta rectangular, ye probable que la infraestructura defensiva fuera precedida nel esterior por un foso. La cortil ocupa una superficie de 5 hectárees, que seríen abondes nel so día para agospiar una lexón.
En tola zona de la sierra de La Bobia, y siguiendo escontra Llugo (Lucus Augusti) caltiénense otros campamentos similares que respuenden a los mesmos patrones de castrametación romana. Pol allugamientu, nuna paraxa d’alta sierra y poles sos característiques constructives, el campamentu tuvo de tener un usu estacional, previsiblemente venceyáu colos movimientos de tropes mientres les guerres ástur-cántabres.
Campamentu d’A Pedra Dereta
Les muertes del campamentu militar romanu d’A Pedra Dereta atópense tamién n’altor, n’una llomba a 891 metros d’altitú, na sierra de La Bobia, barganal de la localidá bualesa de Brañavara, na llende con Castropol. Con una superficie d’unes 10 hectárees, esti campamentu cunta con dos fueses y respuende a la tipoloxía «capa aestiva», campamentos temporales o de marcha del exércitu romanu. Nesti casu, el campamentu tamién tuvo de tener un usu estacional nel mesmu periodu de guerres y la siguiente ocupación del Noroeste peninsular.
