Nuccio Ordine, defensor de la enseñanza de les humanidaes frente al utilitarismu y les pedagoxíes comerciales» que paecen imponese nes últimes décades nes nueses escueles, institutos y universidaes, foi galardonáu col Premiu Princesa d’Asturies de Comunicación y Humanidaes 2023. ¡Norabona!
Filósofu, escritor y espertu en teoría lliteraria, ye reconocíu mundialmente como xuno de los mayores conocedores del pensamientu y la lliteratura renacentistes, y, concretamente, de la figura del humanista napolitanu Giordano Bruno.
Col so popular manifiestu «La utilidá de lo inútil» (Cantil, 2013), Ordine reivindicó que los saberes son fines en sí mesmos, y siguió señalando la importancia de la llectura de los autores clásicos en «Clásicos para la vida» (Cantil, 2017) y «Los homes nun son isles» (Cantil, 2022). Amás d’estes obres, Cantil tamién publicó’l so ensayu históricu «Trés corones para un rei» (2022).
Según la Fundación Princesa d’Asturies, nes sos obres Nuccio Ordine «cavilga sobro la situación marxinal de les humanidaes nel mundu actual y reivindica como disciplines necesaries na formación cívica del ser humanu y na creación d’un pensamientu críticu fundamental pal desenvolvimientu y el bienestar social. Ferrial defensor d’una educación alloñada del enclín al pragmatismu aboga por inculcar nos alumnos el prestar pola conocencia y l’interés pol saber. Según la so visión, xuna amplia base de cultura xeneral va ser la meyor ferramienta por que los mozos puedan encarar con ésitu les variables del mercáu llaboral nun futuru»
Nuccio Ordine quixo dedicar esti premiu a los profesores, que camuden silenciosamente, gracies a la so pasión y arrogancia, la vida de xeneraciones d’estudiantes.
