Festival de l’ablana de L’Infiestu (Piloña)
Tolos años, la primer fin de selmana de ochobre L’Infiestu ufierta una cita cultural y risondera de gran tradición que cunta con un programa d’actividaes festives venceyaes al mercáu tradicional, esposición d’artesanía y productos agroalimentarios, esposición d’aves, esposición d’artesanía de la madera, campeonatos de bolos, etc. Un homenaxe a un fruto qu’en Piloña cada vez cobra más importancia y con una calidá suprema.
Nueche d’ánimes
Los celtes interpretaben el fin del bon tiempu y de la fertilidá de la tierra como’l fin del añu celta, y pensaben que la última nueche del añu, cuando l’añu morría, los muertos llevantense de les sos tumbes caminando polos poblaos. D’equí salen lleendes bien conocíes como la de la santa compaña en Galiza o la güestia n’Asturies que diba polos montes y los pueblos glayando “Andai de día que la nueche ye mio”. Estes almes en pena que sirvíen de guía a los muertos más recién, nun suponíen un peligru para los vivos, pero si éstos atopábenlos y tocábenlos sufriríen el mesmu destín. Les tradiciones rellacionaes con estes lleendes a día de güei son cada vez más frecuentes.
Mayar mazanes
La seronda ye davezu’l tiempu de faer sidra, nel que recoyemos y mayamos les mazanes. Trátase d’una costume bien representativa d’Asturies y que ta claro que llevala a cabu correchamente ye fundamental para una bona sidra. La forma tradicional, casi n’estinción, nel que s’echen les mazanes nun “duernu” (una especie de concu onde se mayen les mazanes). Mayar una mazana nun ye una xera fácil, y d’antiguo solía faese ente dellos, y por xente con brazos fuertes y bien preparaos pa ello. El so trabayu consistía en cutir les mazanes con muncha fuerza, rapidez y en sincronía col restu de xente pa torgar que la mazana escape pelos llaos. Sicasí, anguaño úsase xuna máquina llamada «mayadora».
Amagüestu
L’amagüestu de normal ta acomuñáu al consumu de la castaña, esi alimentu básico de la nuesa cultura tradicional que na seronda empiecen a afatar el paisaxe asturiano. Celébrase sentaos nun prau con amigos y familia nun ambiente prestoso, asitiando les catañes al fueu, removiendo con un palu por que reciban totalmente el calor. Al terminar esfrutamos del so sabor remoyando’l gaznatu con un vasín de sidra dulce, esa que tanto-yos gusta a los neños, igual que xugar nel prau al campu, en metá de dalgún monte recibiendo los últimos ratos de sol del añu.