Dolce centros educativos de Siero y contorna participaron na décima edición del certame, basáu nos 17 Oxetivos de Desenvolvimientu Sostenible de Naciones Xuníes. Videu
- Fonte: LNE / ParquePrin /
Los colexos ganadores de la décima edición del concursu de Güevos Pintos de Parque Principáu fueron los sierenses de Los Campones (El Berrón) y Xentiquina (Lieres) y l’uvieín de La Corredoria. Esti postreru foi escoyíu por votación popular, cola participación de casi seis mil persones.
El primera clasificáu foi Los Campones, cola so propuesta “¡Nun te la cargues!”, que pon en valor la importancia de llevar a cabu práctiques de desenvolvimientu sostenible que contribuyan a protexer y caltener la biodiversidá de los ecosistemes, ente que’l segundu recayó en “Hai un colexu no fondero del mar”, del Xentiquina, que pon el focu na contaminación marina y el so impactu nes especies. Dambos lleven cheques para material escolar.
El tercer premiáu foi’l colexu La Corredoria, con “Tierra, te quiero un Güevu”, nel qu’apuesta pol usu eficiente de los recursos para impulsar un consumu y producción responsable. Tamién se llevó cheque para material escolar. El restu de los participantes tamién fueron agasayaos con una tarxeta regalo. En total partiéronse 2.700 euros en premios.
Para la decoración de los güevos, a cada colexu asignóse-y unu de los 17 Oxetivos de Desenvolvimientu Sostenible (ODS) de Naciones Xuníes qu’inspiren Orixe, el proyectu de Sostenibilidá de Parque Principáu nel que se centra la temática de la edición.
El concursu forma parte de la programación añal del centru dende va una década para sofitar el caltenimientu d’esta festividá declarada Fiesta d’Interés Turísticu Nacional ente alumnos y families, y cola que collabora añalmente donando 3.000 euros a la Sociedá de Festexos Pola de Siero pa caltener viva esta tradición.
