-
Naz Tasio, proyectu d’electrónica y asturianada del que yá se pueden sentir dos cantares. Fonte: Músucasturiana.com
- Tasio: Spotify /
Güei s’estrenen en toles plataformes musicales los dos primeros cantares de Tasio, un proyectu nuevu de Dudu García. “Tener praos” y “Texedora” son les pieces coles qu’esti músicu curtíu en formaciones como Merlín, Cuchu o El Velcro, decide «da-y un calter más personal» a la so música y «desendolcar la faceta de cantante». D’esta manera axunta dos soníos colos que lleva «rabilando cuasi dos décades»: la música tradicional y la electrónica.
«La electrónica fai d’arrope y aporta llinies de baxu y bombu que faen medrar un poco más el soníu de la toná», desplica García. Asina ye como “Tener praos” ye «una composición que vien de la necesidá de facer temes propios pa sentir la tonada como daqué más actual», mentes que “Texedora” ye una reinterpretación de l’asturianada “Texedora de bayu”: «Deprendí’l cantar fai yá bastantes años del cantante Horacio Huerta, que grabó esti tema col grupu Lliberdón y tien especial importancia pa mín porque foi parte de la mio infancia».
Les dos canciones son el puntu de partida de Tasio, un proyectu que, como desplica Dudu García, ta «orientáu a facer directos» y nel que van tar tamién presentes «dalgunes pieces pal baille nel mesmu sen de meter electrónica pallá». Anguaño’l músicu ta trabayando en «más temes nuevos con composiciones propies» y anque nun quiera reclamase «como un renovador de la canción asturiana», la so propuesta sí que vien a arriquecer esti xéneru xunto a otros proyectos qu’él mesmo destaca como los de Fruela 757 o Llevólu’l Sumiciu. «Veo’l futuru de l’asturianada como dalgo más coloríu y menos acotáu», sentencia l’alter egu de Tasio poniendo optimismu sobre’l camín que tien per delantre esti son de raigañu.
https://musicasturiana.com/wp-content/uploads/2024/04/tasio-electronica-asturianada.jpg
