- Canal youtube Xera Asturies
- Entrevista MusicAsturiana.com
Xera llanza’l so primer cantar en 10 años: “Corales de cristal”
Xera, una de les bandes pioneres n’amestar música electrónica y folk allá pel 2004, vuelve tres diez años ensin publicar material nuevu. “Corales de cristal” ye’l single que yá se pue sentir en toles plataformes musicales y que vien acompañáu d’un videoclip que yá tien amás una distinción de plata nel Berlin Music Video Award. Falamos con ellos pa conocer meyor les razones d’esti regresu y los próximos pasos d’esta banda nu folk.
“Corales de Cristal” ye’l cantar nuevu y videoclip que publicáis dempués de diez años ensin asoleyar música nueva. ¿Por qué tanto tiempu y qué tuvistis faciendo esta década?
De 2016 a 2019 tuviéramos embarcaos en dellos proyeutos culturales en Países Baxos al rodiu de la capitalidá cultural europea de Ljouwert (Leeuwarden). Ellí desendolcamos varies actividaes rellacionaes cola nuesa música y la nuesa llingua, l’asturianu. Foi mui prestosu ver cómo la nuesa cultura y llingua materna foi abrazada polos diferentes actores sociales y culturales de Frisia, destacando les collaboraciones con Afûk. Dempués llegara la pandemia y un tiempu de reflexón que convidónos a reconducir les nueses vides. Esi foi’l momentu nel que decidiéramos concretar cómo siguir con Xera, a otru ritmu y con otru mimu.
¿Qué tien de nuevo y de vieyo esti cantar y cómo foi’l procesu de grabación?
“Corales de Cristal” marca dafechu la dirección estética que garra aguaño la música de Xera. Continuamos coles bases elleutróniques y industriales, los sintetizadores, instrumentos tradicionales, como la zanfona y la gaita asturiana, la voz y la nuesa llingua. Lo que se caltién de la Xera d’enantes ye lo melódicu de la so composición y el contraste ente percusión agresiva, soníos etéreos, electrónica d’evasión ya instrumentos tradicionales completamente acústicos. Sicasí nun pue comparase esti cantar con nengún otru que Xera espublizara nel pasáu.
Pa la grabación de la gaita cuntamos col gran mayestru gaiteru Jose Manuel Tejedor, el cual grabara la gaita l’añu pasáu nos Tutu Estudios de Corvera. La voz y la zanfona grabáronse nos estudios CasaCaída que montáramos en Frisia.
En cuantes a cambios nos miembros de Xera. El trescurrir del tiempu fai que non toles persones puedan tar ehí pa siempre. Xera siempre fuera Vérval y Flavia, pero’l grupu ye necesariu pa la puesta en direutu de les creaciones. Ensin esos músicos, nun sería posible llevar el nuesu universu a un escenariu. Na nuesa páxina web (www.xera.eu) hai un apartáu dedicáu a la nuesa historia ya la de los que nos acompañaren dende 2004. Toos saben bien lo agradecíos que tamos a tol so esfuerzu durante toos estos años. La formación actual de Xera cuenta aguaño con Jordi Fernández Boltá a la gaita y flautes, Pablo Pumarada Zarabozo a les percusiones y la yá veterana Ana Fernández Palacio a los teclaos y coros.
El cantar vien acompañáu de videoclip. ¿Podéis falanos tamién d’él? Asina como de la distinción nos Berlin Music Video Awards.
El video cunta la historia d’un guaḥe que ye rei nun llugar onde nin los colores nin la vida esisten hasta que llega daqué que lo camuda too. Con esti planteamientu unviáramos el videoclip al festival Berlin Music Video Awards. Teníemos delles esperances nesti festival, teniendo en cuenta que ta abiertu a tou tipu de proyeutos de cualquier país y en cualquier llingua. Nun pudimos más qu’alegranos cuando nos comunicaren que “Corales de Cristal” entraba dientro de les categoríes de plata y formaría parte del programa oficial del Festival. Tamos yá cola entrada acutada pa dir a la proyección y intervenir no que seya necesario. En cuantes al trabayu nel videoclip, esti escribióse n’avientu de 2022-23 y grabóse n’ochobre de 2023 ente Piloña, Ribeseya y Cuaña. Nesti videu cuntamos coles cámares de Valle Producciones, el vestuariu y casting de Maite Capín, la producción d’Alfredo Sánchez, el maquillaxe de Biko, David Prieto pa l’atrezzo específicu y una montonera de neños y neñes que nun cabríen nesta entrevista. Sí queremos nomar d’ente tolos guaḥes a Iván Solano Velasco, el nuesu neñu rei, que tien un papel nel videu.
¿Esti llanzamientu supón la vuelta de Xera los escenarios y a publicar material nuevu? ¿Y el vuestru regresu a Asturies?
Como te comentamos enantes, plantegáramos camudar el ritmu y forma de trabayar en Xera. Agora vamos entamar dando a conocer novedaes y espardiendo no posible la nuesa música pero dándo-y más tiempu a la presentación del álbum. Tien munchu que ver colos tiempos que vive la música aguaño. En cuanto a los escenarios, Xera tornará anque sigamos viviendo nos Países Baxos.
