- Fonte: Ayto. Oviedo / Oviedo en el Origen
- Uviedo te cuida:
https://www.oviedo.es/oviedotecuida/oviedoenelorigen
Alfarería
El pueblu de Faru, na parroquia de Limanes dientro del conceyu d’Uviéu, ye tierra pionera de la cerámica asturiana. Nesta zona pueden atopase los trés tipos de folla qu’utilizaben para la so ellaboración: folla común, folla blanco y barrucu.
La so alfarería llegó a constituyir una importante industria, cuando los artesanos de Faru abastecíen al centru de la rexón de los instrumentos propios de la dómina.
Arqueolóxicamente comprobóse que la producción d’alfarería na aldega de Faru remóntase siquier al sieglu XI, yá que se topó un fornu medieval y munchos restos de cerámica negra.
Tamién atopamos testimonios escritos d’esti trabayu nel cartulariu del Conventu de San Vicente d’Uviéu, que data del añu 1079. Desque llegó la dómina de la industrialización, cuando’l vidriu y el metal vinieron suplir rotundamente los usos de la folla, Faru foise despoblando y los sos alfareros fueron emigrando a núcleos rurales, onde entá yeren necesarios los sos productos.
L’oriente d’Asturies atropó bona parte d’esa emigración, siendo famosu los alfareros de Piloña, Parres y principalmente Cangues d’Onís, onde llegaron a esistir hasta cinco alfareríes.
Anguaño na aldega de Faru solo queda un alfareru qu’heredó l’oficiu de les sos antepasaos xeneración tres xeneración.
Ferreros
Trabayen el fierro n’unos talleres conocíos como Ferreríes, onde tienen un fornu para calecer el fierro hasta que se vuelve incandescente “en caldia” para poder moldialo. Por ello suelen ser talleres escuros para poder ver los colores del fierro, que pasa de colloráu a anaranxáu y mariellu. El color ideal para’l forxáu ye’l blancu anaranxáu.
Tamién precisen grandes martiellos para cutir y moldiar (forxar) el fierro sobro la incla.
Na Edá Media ya inclusive na dómina romana, esistíen tamién lo que conocemos como Fragua, un Inxeniu hidráulicu necesariu pa trabayos de gran tamañu como les ruedes de los carros de caballos, qu’aprovecha la fuerza de los ríos pa poner en marcha’l mecanismu que mueve enormes y pesaos martiellos (en dellos casu de más de 500 quilos). La finalidá yera tresformar los tochos (lingotes de fierro) en llámines. Xuna tresformamientu prioritariu que suponía un gran aforru de tiempu y esfuerzu antes de pasar a rematar manualmente tou tipu d’instrumentos
N’Uviéu, el gremiu de ferreros, taba concentráu na cai Ferrería qu’anguaño ye la cai Mon, anque más tarde treslladáronse a estramuros, con cuenta de protexer la ciudá del peligru de quema.
L’alquimia
Considérase alquimia a una antigua disciplina filosófica de base esotérica rellacionada con ciencies como la química, la metalurxa, la física, la medicina, la metafísica y, inclusive, l’arte.
Mientres l’oscurantismo de la Europa medieval foi considerada, probablemente pol so orixe oriental, fonte de saberes ocultos y bruxería, y por tanto, escorrida. El so oxetivu final yera la busca de la piedra filosofal lo que ponía en xaque la bien armada estructura de poder de la ilesia cristiana medieval
Sicasí, nel llinguaxe místico y hermético de l’alquimia, la piedra filosofal ocupa un llugar central na busca de la perfección, el llume y la felicidá celestial. Según esta tradición, la piedra foi apurrida por Dios al mesmu Adán, y foi responsable de la llonxevidá de los patriarques bíblicos.
Nesta llínea, dellos estudiosos non académicos indiquen la relación ente l’alquimia y les catedrales: los principios d’esta sabiduría atoparíense espuestos a la vista de toos pero al traviés de símbolos incomprensibles pa los ensin entender. Por casu, la relación ente la planta de cruz col crisol alquímico o’l conceutu “arte gótico” col términu “xíriga”, un llinguaxe secretu solu pa empecipiaos.
Asina, unu de los personaxes más misteriosos del arte medieval, el Green Man, representa un espíritu vexetal, símbolu de la vida y del resucitar de la naturaleza venceyáu a la primavera y al ciclu reproductivu, colase n’infinidá de templos románicos y góticos, como numberoses ilesies d’Inglaterra, Francia y Alemaña, nes catedrales de Santiago de Compostela, Uviéu, Burgos, Toledo o Llión.
Platería y Orfebrería
Orfebrería ye l’arte de llabrar oxetos artísticos d’oru, plata y otros metales preciosos, o aleaciones d’ellos.
La orfebrería y l’artesanía del acebache son les manufactures que más s’acomuñar cola pelegrinación. A lo llargo del Camín de Santiago esistieron ciertos focos d’ellaboración d’oxetos d’oru, plata ya inclusive piedres precioses venceyaos a la simboloxía xacobea.
N’Uviéu’l gremiu de los plateros tenía la so cai, güei sumida, allugada nes cercaníes de la catedral.
Dende principios de la Edá Media, esta orfebrería tien bien delimitaos les sos grandes temes, que se reproducen una y otra vez: la concha de vieira, el bordón (cayáu) del pelegrín, les imaxes de Santiago como pelegrín y cruces, casi siempres en plata, una y bones la plata ye, xuntu col acebache, la base de los oxetos calidable empobinaos a los pelegrinos.
Son símbolos que se reproducen individualmente o como parte de los más diversos oxetos: petrines, zurrones, vasos, medayes, crucifixos, etc. Estos oxetos yeren tan importantes para los pelegrinos que munches vegaes faíense soterrar con ellos.
Podemos afirmar que la orfebrería, como una actividá propia de los pelegrinos, nun se va desenvolver hasta l’entamu de les pelegrinaciones europees, nel sieglu XI y consolídase definitivamente mientres el sieglu XII, el gran periodu de la pelegrinación medieval. Ye una actividá centrada tantu nel pelegrín como na creciente demanda d’oxetos para la lliturxa y el cultu.
La casa medieval
Na Edá Media podemos atopar distintos tipos de viviendes dependiendo de la clase social a la que los habitantes pertenecieren. Los principales materiales que s’utilizaben yeren la piedra, la madera y materia vexetal.
Les viviendes más humildes namá teníen una estancia que sirvía de cocina, sala y cuartu. Llabradores y artesanos dormíen en colchones que podíen endolcase mientres el día para aprovechar meyor l’espaciu. Los llabradores amás teníen una habitación para los preseos del campu. Los artesanos compartíen la so casa col taller y n’ocasiones cola tienda.
Les cases teníen un pequenu patiu traseru onde solía haber un pequenu güertu, una corrolada, un pozu y una letrina..
Nes ciudaes les cases más habituales, que yeren les de clase alta, componse de dos pisos y taben construyíes de piedra y madera. El pisu inferior solía cuntar con un pequenu patiu y delles habitaciones con distintes funciones a la so alredor. Nel pisu cimeru atopábense les habitaciones de la familia. Munches vegaes les viviendes compartíen les vigues de madera ente sí, esto faía qu’en casu de quema les llapaes pasaren d’una casa a otra. Na navidá de 1521 Uviéu sufrió una quema que dexó la ciudá prácticamente destruyida. El fueu empezó n’una de les cases, paez ser que nun fornu o con un infiernillo pa xenerar calor, y les llapaes fueron taramiando la ciudá borrando cualesquier traza medieval.
Fiestes medievales
Metanes una esistencia vulgar ensin imaxes atentes, la fiesta urbana na Edá Media significaba un paréntesis. Les fiestes yeren fundamentalmente relixoses y la mayoría rellacionense colos ciclos agrarios que marcaben la vida de los habitantes urbanos.
La celebración del Antroxu y otros espectáculos burlescos resultaron contrarios a la norma opresiva, porque daben llugar a una interpretación llibre de la vida que s’entendía como fonte d’emancipación.
Cualesquier que fuera l’orixe, toes elles yeren momentos de socialización y creación de fuertes llazos, que marcaben les estaciones y casi siempres se vivíen nel esterior de les humildes viviendes, nes cais.
Traza particular de les celebraciones uvieines na Edá Media y celosamente esixida pol conceyu urbanu foi la participación de les confreríes
Na ciudá medieval, cualquier acontecimientu de calter estraordinariu y escepcional yera dignu de celebración, como les victories militares y les bones nueves llegaes dende la Corte según tolos acontecimientos personales venceyaos cola casa real dignos de ser festexaos.
Xuglares
Los xuglares yeren unos personaxes d’orixe humilde de la dómina medieval, cómicos ambulantes que se dedicaben amás a exercicios circenses, faciendo xuegos malabares, actuando como volatines y saltimbanquis, como bufonos que cunten chistes y toquen preseos senciellos o baillen y canten representando pieces sencielles de mimu o títeres, recitando versos que componíen otros autores.
Realizaben les sos funciones bien nos llugares públicos como les places de los pueblos o nos castiellos de los señores feudales.
El xuglar cumplía dos funciones, informar y entretener. En cuenta de la so actuación recibíen, comida, vistíos, vinos, agospéu y delles vegaes dineru y asina se ganaben la vida.
Torre defensiva d’Alfonso III-la Fortaleza
Esta torre conocida como la Fortaleza o’l Castiellu, foi mandada construyir pol Monarca Asturianu Alfonso III a finales del sieglu IX. Trátase d’una sólida edificación de piedra con torrexón y almenes que formaba parte de la muralla realizada nesa dómina, col fin de xixilar les incursiones enemigues que s’averaben a la ciudá, especialmente les normandes. Sirvía para protexer la Catedral de San Salvador y la mesma ciudá.
Años más tarde el rei Alfonso IX dispon ampliar la cortil cercada, que se remató mientres el reináu d’Alfonso X y deciden incluyir esta torre de casi venti metros d’altor nel nuevu trazáu medieval, nel ángulu esti de la muralla, onde tamién s’abre una de les entraes a la ciudá: la puerta de Socastiello.
En 1716 úsase de polvorín y una esplosión del material almacenáu causó-y graves daños. Pero foi mientres la Invasión francesa y la Guerra de la Independencia nel añu 1810 cuando más daños sufrió, quedando prácticamente en ruines.
Más tarde, en 1823 construyise n’ese solar un nuevu inmueble que siguió llamándose la Fortaleza y funcionó como cárcel d’homes hasta que se construyó la cárcel modelo en Ciudá Naranco, quedando l’anterior en desusu y baltándose para construyir l’edificiu de la telefónica en 1929.
Al pie de la torre atopaba’l palaciu del Rei Alfonso III, asitiáu na actual cai Schultz. D’esti palaciu, que na Baxa Edá Media pasó a ser hospital de pelegrinos, apenes queden dellos restos nel muséu arqueolóxicu y en colecciones privaes.
El gremiu del pan
A finales del sieglu XIII la población n’Uviéu yá superaba los 5000 habitantes, visitada davezu por pelegrinos qu’introducieron l’estilu comercial de los francos, siendo lo primero que se viende nos sos comercios el pan y la sidra.
Nesta dómina’l pan yera’l 70% de la ración diaria del alimentu, sobremanera nes clases baxes, que lo ellaboraben con dellos tipos de ceberes: el centenu, l’avena, trigu sarracenu, el miyu o la escanda. La farina de trigu blancu y refináu consumíala namá les clases altes.
Esti alimentu acompañase con otros productos “companagium”, y con bébores como’l vinu, la cerveza o la sidra, una y bones l’agua yera un focu de tresmisión d’enfermedaes.
Nel Uviéu medieval yeren les muyeres,” les panaderinas”, encabezaes por María Pérez nel sieglu XIII, les principales encargaes de la so ellaboración, y a les que les Ordenances obligaben a imponer una marca o señal en cada pieza fabricada. Les panaderes encargabanse d’amasar y vender el pan, y los forneros de cocelo.
Los dueños de los fornos cobraben una porción del pan qu’enfornaben ente que les panaderes, mal pagues, diben col cestu na cabeza de puerta en puerta para la so vienta, una y bones poques teníen un puestu fixu de vienta.
Tocantes a el so allugamientu na ciudá, nesta dómina, si sabemos que, na cai del Pesu, pesábase la farina que depués yera llevada a los fornos, asitiaos fora de la muralla por mieu a les quemes.
N’Uviéu siempres foi importante la producción de pan y farina yá que llegó a tener documentaos hasta 49 molinos.
Ilesia de Santuyano de Los Praos
Ye’l mayor de los edificios prerrománicos qu’entá se caltien. Foi consagrada nel añu 792 nel reináu d’Alfonso II El Castu y ye conocida tamién como Santullano, el nomatu de los Praos vien-y por el so llugar allugamientu.
Formó parte d’un conxuntu palatín que foi donáu a la Catedral de San Salvador d’Uviéu.
La ilesia ye de planta basilical, formada por trés naves y un transepto. La nave central ye más alta y ancha que les llaterales, utilizándose la diferencia d’altor para abrir ventanes.
Nel ábside central atopamos la cámara secreta, una habitación a la que solo s’apuerta dende l’esterior al traviés de la ventana trífora.
Les ventanes tán decoraes con celosíes y el muriu realizáu en sillarexo y con contrafuertes.
Tola ilesia, sacante los ábsides tien cubierta de madera de carbayu.
L’interior de la ilesia atópase decoráu con pintures murales ellaboraes al frescu, la técnica emplegada ye’l punzón sobro estuco y posterior pintura. Los colores más utilizaos son azules, ocres y colloraos y siguen xuna tradición a imitación del estilu pompeyanu.
Suministru y consumu de pexe n’Uviéu
mientres la Edá Media
Los carniceros y los pescaderos fueron los primeres n’estremar, por razones d’hixene, un espaciu para la vienta y otru para’l caltenimientu y l’almacenamientu del productu.
La ciudá recibía importantes cantidaes de pexe, tantu de la mariña avilesina como de los ríos Nora y Nalón, lo que dexaba a los sos habitantes introducir dichu productu na so dieta alimenticia diaria.
El pexe de mar tenía d’esponese nos bancos del azogue namás llegar a la ciudá, amosándose a los vicarios encargaos d’ello antes de ser descargáu y castigándose cola perda de vecindá la costume de “estremar” el pexe y dexalo en cases particulares.
La sardina, el cóngaru y la merluza fueron les especies básiques de la producción pesquera, xuntu col salmón, bien abondosu nos ríos asturianos.
La pescadería tuvo suxeta mientres tola Edá Media al control directu del conceyu, que nomaba un visitador, encargáu de xixilar el caltenimientu y garantizar “que’l pescaderu cumpliera tou aquello a lo que ta obligáu”, incluyendo la hixene y llimpieza de la ciudá. Por casu, taba prohibíu, tener el pexe na ciudá más de dos díes pel branu y trés pel hibiernu.
Dada la facilidá de descomposición d’estos productos, el pexe vendíase secu o frescu remoyáu.
Pa faer posible’l so consumu, el pexe seco sufría un procesu inversu al del caltenimientu, volviendo ser amugáu pal so cocináu posterior. Teniendo en cuenta que nun esistía agua corriente nes cases, el pexe vendíase yá remoyáu, poniéndose n’agua dos o trés díes antes de la vienta por que coyera el mugor abondo que-y dexara ser consumíu dempués.
Al igual qu’asocede en col oficiu de les panaderes, tradicionalmente destináu a muyeres, tamién lo taba la vienta ambulante de sardines.
Tamién intervinieron les autoridaes uvieines nel acondicionamientu de los llugares de vienta y provisión d’alimentos, habilitando edificios como la plaza del pexe.
Tortures
Nel sieglu XII, el decretu del papa Lucio III tuvo una gran importancia na evolución de la Inquisición Medieval que se realizaba col fin de consiguir confesiones, como métodu de prueba y para determinar la veracidá o falsedá d’una acusación y la culpabilidá o inocencia d’una persona.
Los procedimientos de tortura más emplegaos pola Inquisición fueron:
El tormentu de la garrucha consistía en colgar al reu del techu con una polea por mediu d’una cuerda atada a les muñeques y con pesos ataos a los todíos, dir izándolo amodo y soltar de sópitu, colo cual brazos y piernes sufríen violentos tirones y n’ocasiones escordábense.
La toca, tamién llamada «tortura de l’agua», consistía n’arreyar al prisioneru a una escalera inclinada, cola cabeza más baxa que los pies ya introducir una toca o un pañu na boca a la víctima y obligala a inxerir agua arramada dende un xarru por qu’albidrara de que s’afogaba.
El potru onde’l prisioneru tenía les muñeques y los todíos ataos con cuerdes que se diben retorciendo progresivamente por mediu d’una palanca.
Nes places públiques populares, los métodos de tortura más utilizaos yeren la Garduña y la Picota, que nun teníen por qué acabar cola vida del axusticiáu, sinón más bien, humildalo públicamente.
La tortura foi abolida n’España pola Constitución de Bayona de 1808.
