Nació nel parque el día 24 d’abril. D’esta forma, los visitantes qu’esta Selmana Santa s’averen a Cabárceno yá van poder ver al pequenu elefante.
El Parque de la Naturaleza de Cabárceno dio la bienvenida a un nuevu exemplar d’elefante africanu, el vigesimocuartu que naz na instalación cántabra dende la so inauguración en 1990 y el segundu d’anguaño, tres l’allumamientu de Beatuca el pasáu 18 de xineru.
Trátase d’una fema que nació esta selmana, con un pesu d’unos 90 quilos y que ye fía de Hilda, tamién dada a lluz en Cabárceno fai 22 años, lo que, de la mesma, convierte a la nueva cría nel decimotercer elefante de segunda xeneración allumáu nel parque.
El pequenu paquidermu ye la quinta cría de Hilda y va haber qu’esperar a faer el test de paternidá para confirmar cuál de los trés machos, Jums, Jumar o Yambo (esti postreru treslladáu a un zoo d’Holanda) ye’l proxenitor, según informó’l Gobiernu de Cantabria n’una nota de prensa.
La esperiencia de la madre favoreció que’l partu, tres 21 meses y 16 díes de xestación, trescurriera de forma natural y ensin contratiempos, lo que facilita la integración col restu de la menada del pequeñu exemplar, que yá salió a la pradería para familiarizase colos otros 20 elefantes que yá convivíen na cortil.
Col so quintu partu a los 22 años, Hilda conviertese n’una de les femes más prolífiques qu’hai n’Europa y, según los veterinarios y cuidadores, con muncha vida per delantre para siguir reproduciéndose. Martín, Saja y Maruca, trés de les sos críes, tamién viven nel parque cántabru, ente que la cuarta finó.
