- Fonte: Asturies.com / LNE / Asturnews
-
Jaime Álvarez Fernández trai p’Asturies el so segundu Mac Crimmon, “el mayor premiu al que pue optar un gaiteru”
Na semeya, Stuart Liddell, reconocíu gaiteru escocés que ganó’l XLI Trophée Mac Crimmon pour Solistes de Highland Bagpipe/Grande Cornamuse, y Álvarez Fernández colos respeutivos trofeos.
Nel 2017 convirtióse, con 16 años, nel más mozu en ganar el Trophée Mac Crimmon del Festival Interceltique de Lorient y seis años depués repite victoria. Jaime Álvarez Fernández trai a Asturies una edición más “el mayor premiu al que pue optar un gaiteru”, espresa’l de La Fresneda, intérprete más valoráu d’una edición que tuvo un altu nivel.
La delegación asturiana consigue per segundu añu siguíu’l Trophée Mac Crimmon y acumula ocho victories nes nueve ediciones últimes, racha qu’arrancó nel 2013 –nel 2020 y 2021 nun se celebró por cuenta de la pandemia de COVID-19– con Jesús Fernández González, al que-y siguiría precisamente l’hermanu de Jaime, Álvaro Álvarez Fernández, vencedor del 2014 y 2015. Namái nel 2019 María López Carballo, que quitó’l récor a Jaime como’l más mozu en llevalu al facelo con 14 años, dio’l trunfu a Galicia nesti periodu.
Son cuatro gaiteros de cada país los que participen nel troféu que tien llugar el primer sábadu del festival. Caún interpreta pieces asturianes, gallegues y bretones, y el xuráu conformáu por representantes de los trés territorios puntúa les actuaciones.
Iñaki Santianes, responsable de la delegación y xunto con Daniel Meré miembru del xuráu asturianu, comentó que “foi un concursu superigualáu, de los que más de los últimos años”. “Nun había un claru favoritu y cualquier cosa podía pasar”, añadió al tiempu que rescampló que “el nivel foi mui altu, como pudo valorar el xuráu y el públicu”.
Quinta participación
Álvarez Fernández na so quinta participación nel Mac Crimmon, con victoria nel 2017 y un segundu puestu l’añu pasáu, resultaría’l ganador sobre’l gallegu Rafael Carracedo, que fora terceru precisamente nesi 2017. En tercera posición quedó’l tamién asturianu Diego Lobo, mentes que pal país vecín foi la cuarta y quinta, pa Diego Prieto y López Carballo, quedando empataos como sestos Paula Gutiérrez y Nel Cortizo xunto col gallegu Jorge Castelo.
“Siempre ye una allegría poder tocar nel Mac Crimmon y más poder ganalu per segunda vez”, respuende’l músicu de La Fresneda a Asturies.com mientres disfruta d’unes merecíes vacaciones cola familia per Francia. Álvarez Fernández considera qu’esti troféu, que acumula 36 ediciones, ye “el mayor premiu al que pue optar un gaiteru n’Asturies” y apunta “que tolos años el nivel ye mui altu y yá clasificase ye meritorio”.
El gaiteru asturianu Jaime Alvarez ganó’l 36 Troféu Internacional Mac Crimmon de gaita en Lorient na tradicional competición ente solistes de gaita asturianos y gallegos qu’esti añu cuntaben cola presencia de dos intérpretes femenines, una de cada país celta en competición, cola ganadora d’una de les ediciones, la gallega María López y l’asturiana Paula Gutiérrez
Hai 9 años, un día como esti, un sábadu 5 d’agoatu y cola Irlanda tamién de país celebráu ganaba’l so hermanu Álvaro el primer MacCrimmon d’esta familia de gaiteros que ya tien un sitiu enforma especial bel Festival de Lorient.
Jorge Castelo, Jaime Alvarez, Rafael Carracedo, Paula Gutiérrez, María López, Nel Cortizo, Diego Prieto y Diego Lobo, fueron esta tarde del sábadu los gaiteros que representaron la bona música que se fai a la gaita n’Asturies y Galicia, nun concursu tan competíu como los más nomaos d’esti Mac Crimmon qu’alternando’l nome con la otra marca de whisky que lu patrocinara, McCallan, enlleva 36 años ufriendo en Lorient lo meyor de la gaita de los países celtes del sur. Alternándose cada país nel orde por sortéu y entamando por un gaiteru gallegu p’acabar con un asturianu, el concursu allargose hasta más allá de les tres hores, como davezu pasa añu tres añu.
Los concursantes tuvieron qu’interpretar temes asturianos, gallegos y bretones pa qu’un xuráu formáu tamién por asturianos (Iñaki Sánchez y Daniel Meré), gallegos (Ismael García y José Manuel López “Josele”) y bretones (Gilles Houez y Fred Gauthier) escoyera’l a quien diba parar el Troféu d’esta edición.
Tres de les deliberaciones, l’orde final del concursu dexó en segundu llugar al gallegu Rafael Carracedo , el tercer llugar fue pal asturianu Diego Boto, na cuarta posición quedare el gallegu Diego Prieto, el quintu llugar fue pa la gallega María López, ganadora nuna edición anterior del troféu, y la sesta posición algamáronla exaequo Paula Gutiérrez, Nel Cortizo y Jorge Castelo.
