Publicado en Entrevistes

Entrevistamos al cosplayer asturianu ZananWars

Semeya de María Parra Photography

«el cosplay ye una manera cola que puedo
dar vida a los mios personaxes favoritos»

ZananWars, un cosplayer que curia caún de los detalles de los sos traxes. El trabayu de los sos traxes y les sos actuaciones ficieron qu’algamara dellos premios en concursos, ente los que tán el del Salón del Manga d’Asturies 2018 o’l del Market Freak 2019.

¿D’ónde vien el nomatu de ZananWars?

Ye un acrónimu de varies pallabres xuntes:“Z” ye’l nomatu cariñosu del personaxe Parzival de la película Ready Player One; “anan” son les primeres y cabera lletra de Anakin Skywalker, un de los mios personaxes favoritos y col qu’entamé nesti mundu; y “Wars” ye pola saga Star Wars, de la que soi un gran fan.

¿Qué significa pa ti’l cosplay?

Siempre me prestó dende neñu “amazcarame” y el cosplay ye una manera cola que puedo dar vida a los mios personaxes favoritos, yá sía d’una película, d’un anime o d’un videoxuegu. Nesos momentos nos que tas con un cosplay nuna convención, nun concursu o nuna pasarela, ye cuando me tresporto a esi mundu ficticiu que toi representando, y ye entoncies cuando puedo meteme na piel d’esos personaxes y esa ye la meyor sensación.

¿Cómo aportasti a esti hobby? ¿Cuánto tiempu lleves faciendo cosplay?

Llegué de casualidá, como comentaba enantes siempre me prestó “amazcarame”, asina que va 6 años na Metrópoli vi’l desfile de Star Wars que facíen y dixi: quiero ser ún d’ellos. Taba como un neñu pequeñu viendo aquello, asina qu’a partir d’ehí falé cola Asociación Orden 66 Asturies, que se dedica a promover l’universu de Star Wars al traviés de causes benéfiques. Entamé con un cosplay de Star Wars y dempués foi cuando entamé a deprender a trabayar materiales y quixi siguir con personaxes d’anime, de videoxuegos, etc. Y nesti enguedeyu sigo metíu dende aquel momentu.

¿Cuál foi’l to primer cosplay? ¿Por qué escoyisti esi personaxe?

El primer cosplay foi d’Anakin Skywalker del Episodiu 3 de Star Wars, porque siempre foi’l mio personaxe favoritu de la saga. Agora veo les semeyes del entamu y como toos digo: cómo diba yo con eses pintes, h.ah.a.

Como cosplayer, ¿cuál ye la parte que más te presta cuando faes cosplay? ¿y la que menos?

Lo que más me presta ye la costura, sicasí, últimamente toi entamando a enganchar coles armadures. La parte que menos me presta ye estilizar peluques, nun ye’l mio fuerte, anque a base d’estropiales voi ameyorando.

No que cinca a los personaxes o los traxes, ¿cómo sueles escoyelos o qué ye eso que ta fai dicir “quiero facer esti cosplay”?

En primer llugar, siempre quixi facer personaxes que d’una o otra manera me marcaran, yá sía na infancia o na adolescencia, como por exemplu, Matt de Digimon, Link o Draco Malfoy. Y llueu, per otru llau, tamién tán los típicos flechazos con dalgún anime, videoxuegu o película, o hai veces que pola estética, como por exemplu 9S, Parzival o Seiya.

De tolos cosplays que ficisti hasta agora, ¿cuál ye’l to favoritu?

Pues ye una entruga difícil, tengo-y ciñu al cosplay de Link, porque foi’l primeru que fici completu y amás tuvi que lu coser a mano porque entá nun tenía máquina de coser. Pero si tengo que quedame con ún, por dificultá, hores de trabayu y resultáu diría que’l set d’armadura del Barioth de Monster Hunter World.

Yes un cosplayer que suel participar en concursos, ¿préstente más los de pasarela o los d’actuación?

Ensin duldar, los d’actuación. Hai que preparar munches más coses, ye más complicao y non siempre sal como esperes, pero lo que más me presta ye que nesi momentu ye cuando de verdá toi dando vida al personaxe y ye nel que más esfruto.

Les pasareles tán bien pa personaxes con poca movilidá que nun te permiten facer una bona actuación, pero magar que participé en dalguna, nun me presten muncho.

¿Qué otres aficiones tienes aparte del cosplay?

Siempre me prestó muncho’l deporte y fici munchos: fútbol, bodyboard…pero si tengo que quedame con un, escoyería’l ciclismu. Por una lesión yá nun puedo facelo tanto como me prestaría, pero siempre que puedo escapo cola bici a facer dalguna ruta.

¿Cómo t’afeutó’l coronavirus al to día a día y al cosplay? ¿Cómo ves el futuru a cortu y a un plazu llargu del cosplay y les convenciones?

Pues foi como quien diz una llombada pa toos, porque frañó’l ritmu de vida que llevábemos. Pol mio trabayu tocóme ver mui de cerca los efeutos del virus y entá me sigui. Pol mio trabayu tocóme ver mui de cerca los efeutos del coronavirus y la verdá que máncame ver qu’hai xente que yá nun cumple nada de lo que se camienta. A parte d’ello, nel cosplay y magar que nun hai convenciones, valióme pa siguir creando proyectos y preparar dellos traxes nuevos que yá tengo perhí pendientes d’estrenar.

En cuanto al futuru de les convenciones paez qu’esti branu van dir abriendo varies, de xuru que con restricciones d’aforu, embozu, etc. Si se cumplen les midíes, ta bien que poco a poco se vaya normalizando y esperemos que pal próximu añu yá volvamos a les convenciones tal y como les conocíamos.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *