Publicado en NATURA, Salú

Asturies quier amenorgar el metanu de los peos de les vaques y producir lácteos para la llonxevidá

Un proyectu va usar magaya de mazana y algues como alimentu para los rumiantes. Un estudiu del microbioma de persones vieyes va dexar desenvolver un lácteo qu’ayude a consiguir un avieyamientu más saludable

Amenorgar la buelga de carbonu que producen los rumiantes, esto ye, los peos qu’espulsen les vaques y qu’estropien la capa d’ozonu, o detectar estudiar el microbioma de persones vieyes para desenvolver un lácteo, tipu yogur, qu’ayude a consiguir un avieyamientu más saludable. Son dos de les misiones científiques que tien Asturies y nes que va desenvolver un plan piloto primero qu’acabe l’añu.

Los proyectos acaben d’arrincar y güei celebraron la puesta de llongura cola xunta de representantes de toles empreses y entidaes que formen los seis consorcios que participen nesti programa pioneru ente les comunidaes autónomes.

¿Cómo puede contribuyir Asturies a amenorgar los gases d’efectu invernaderu?

Hai trés proyectos en marcha. Unu d’ellos céntrase na Agroalimentación 0 Emisiones. El líder del consorciu, la consultora DEX, y unu de los principales collaboradores, el SERIDA, espunxeron les llínees d’actuación. La más avanzada y contundente: controlar l’impactu nes emisiones de metanu a l’atmósfera que producen los rumiantes tres el procesu dixestivu. ¿Cómo se va a faer? Incorporando subproductos o residuos agroalimentarios a la dieta de rumiantes. D’entrada, nel plan piloto, va utilizase magaya de mazana y algues.

Les misiones tamién contemplen trabayos con materies primes estratéxiques como «vanadiu o cobaltu, que se tán refugando y pueden recuperase». David González resalta qu’en septiembre yá van tar llistos los primeros pilotos. Esplica que, amás de los rellacionaos col hidróxenu verde, «eHealth ye’l más avanzáu». Trátase d’un estudiu pa la ellaboración d’un corsé que busca «correxir la escoliosis idiopática a adolescentes, especialmente neñes, por que de mayores nun tengan secueles». Considera que pa los pilotos contémplase xuna salida al mercáu nun periodu «d’unu a dos años». La idea ye «que n’Asturies se desenvuelvan los proyectos».

¿Y cómo contribuyir a un avieyamientu más saludable?

Unu de los proyectos, lideráu por CAPSA FOOD y que’l so plan piloto va desenvolver el IPLA (Institutu de Productos Lácteos), plantega realizar un mapa del microbioma de persones vieyes y estudiar les resultancies d’introducir na alimentación determinaos probióticos. La idea ye topar biomarcadores que nos empobinen sobro qué ye lo meyor pa nuesa microbiota, qué nos fadrá vivir más y con meyor salú. L’oxetivu final, consiguir un alimentu lácteo, tipu yogur, que nos ayude a tener una llonxevidá más saludable.

Tamién hai en marcha un llaboratoriu del sector senior» que va buscar ellaborar un diagnósticu de toles persones senior d’Asturies pa ver cuálos son les sos característiques y tomar decisiones» pa un avieyamientu saludable que garantice la so autonomía.

Asturies tien como xuna de les sos misiones de futuru al curtiu plazu la diversificación y cambéu de paradigma de la so economía. Un nuevu modelu que dexe reorientar el texíu granible escontra actividaes de mayor valor añedíu y base tecnolóxica. Un oxetivu nel que la collaboración públicu-privada antóxase esencial.

Nesa llínea de llograr una actualización del motor económicu na rexón, el teatru de la Llaboral foi güei l’escenariu de la presentación de los proyectos del programa Misiones Científiques d’Asturies. Les llínees básiques de les misiones son la llonxevidá y avieyamientu activu y l’amenorgamientu d’emisiones y gases d’efectu invernaderu. Seis grandes consorcios públicu-privaos son los encargaos de desenvolver les primeres misiones científiques d’Asturies.

Asturies ye la primer comunidá autónoma en poner en marcha’l programa Misiones Científiques, afaciendo’l modelu de la convocatoria nacional a un sistema de collaboración públicu-privada alliniáu coles estratexes europees d’innovación.

Los segmentos d’actuación de los proyectos son, ente otros, dixitalización, l’usu d’intelixencia artificial, sensorización, impresión 3D, medicina y alimentación personalizada, desenvolvimientu de nuevos materiales biodegradables, recuperación de materies primes esenciales o estudiu sobro l’hidróxenu.

Al actu asistieron representantes de los seis consorcios d’empreses, centros tecnolóxicos ya instituciones que van desenvolver los proyectos; el conseyeru de Ciencia, Innovación y Universidá, Borja Sánchez, según el director xeneral d’Innovación, Investigación y Tresformamientu Dixital, Iván Aitor Lucas.

Borja Sánchez cree qu’esti ye «un programa qu’asitia a Asturies como pionera nesti tipu d’iniciatives», que «pivoten en redol a les llínees maestres de la política d’I+D+i europea», con un puntu de vista multidisciplinar» que sirve de «amuesa del potencial que tenemos n’Asturies».

Considera que ye gratificante la collaboración ente la Universidá d’Uviéu, CSIC, FIMBA, centros tecnolóxicos, la gran empresa asturiana…» y otres entidaes. Dende’l so puntu de vista «la sociedá tien que ver agora pa lo que sirve la investigación n’Asturies». Amás de pal desenvolvimientu d’una serie de proyectos piloto, esta collaboración va dexar «texer aliances y sinerxies» y «convertir Asturies nun polu d’innovación». La intención de la de conseyería de Ciencia, Innovación y Universidá pasa por «que l’añu que vien haya xuna nueva convocatoria».

David González, director de Desenvolvimientu de Negociu y Estratexa n´Idonial, sociu tecnolóxicu integral pa desenvolvimientu de materiales, fabricación avanzada y dixitalización de la industria que co-lidera cinco de los seis consorcios d’empreses encargaos de los proyectos, destaca qu’hai «dos temátiques» esenciales nos mesmos, como son «l’amenorgamientu d’emisiones y avieyamientu activu». Les iniciatives denominense eHealth, Alimes, El retu d’avieyar, Agroalimentación 0 emisiones, Maprestas y Ruta del hidróxenu H2.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *