Publicado en Música

Primer taller d’instrumentos 3D d’Asturies.

El gaiteru Tever llanza un crowdfunding pa montar en Teberga un taller de fabricación d’instrumentos en 3D. D’algamalo, va ser el primer taller d’instrumentos 3D d’Asturies.

El gaiteru Tever ta a la cabeza del proyeutu que busca facer que Teberga acueya la primer industria de fabricación d’instrumentos en 3D d’Asturies, concretamente nel conceyu de Teberga, que lu sofita activamente.

Nel crowdfunding que tien llanzáu, algamáronse’l 37% de los fondos precisaos en namás trés díes, polo que prevese que la campaña trunfe y consiga facer qu’un conceyu rural y pequeñu como Teberga pueda ser el referente asturianu na fabricación d’instrumentos musicales en 3D, pos de llogralo, sedría’l primeru en contar con esti tipu d’industria.

El gaiteru Tever, qu’amás ye informáticu, aspira a facer que Teberga seya un epicentru innovador de la música tradicional pos nun se trataría namás de facer instrumentos en 3D, sinón tamién d’otros proyeutos de formación musical, investigación y proyeutos creativos.

El Conceyu de Teberga cedió-y a Chaglga (que ye como se noma’l proyeutu) l’usu d’un espaciu municipal na llocalidá d’Entragu. La campaña de crowdfunding busca consiguir pelo menos dos impresores de 3D profesionales.  El proyeutu pue sofitase nesti enllaz, onde se desplica esautamente en qué consiste. Hasta’l 30 de marzu va tar abiertu y quien lu sofite va tener recompenses que van dende flautes impreses en 3D hasta manuales de gaita y exemplares físicos del EP inéditu Suañu de gaita o oxetos de merchandising como camisetes, imanes y boles d’algodón personalizaes.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *