Publicado en Artículos

Les muyeres prehistóriques tamién cazaben grandes animales


L’afayu d’una moza coles sos armes en Andar cuestiona la teoría del home cazador

Testu de Miguel Ángel Criado.  Diariu El País 4 de payares 2020

Una moza d’ente 17 y 19 años soterrada fai unos 8.000 años al pie de les sos armes amuesa que la caza de grandes animales nun yera solo cosa de los homes prehistóricos. Tres el so afayu, los sos autores revisaron otru centenar d’enterramientos atopando que más d’un terciu de los cazadores yeren en realidá cazadores. Estes resultancies cuestionen la idea dominante de que nes primeres comunidaes humanes yá había xuna división del trabayu por xéneru.

En 2018, arqueólogos estadounidenses y peruanos escavaron xuna serie d’enterramientos a 3.925 metros d’altor, nel distritu de Puno, n´Andar (Peru). N’una de les tumbes, al pie de un cuerpu mal calteníu había xuna ventena de piedres llabraes. Cuatro de los artefactos yeren puntes afilaes, probablemente usaes en venablos, xunas pequenes llances impulsaes por una especie de tubu. Tamién había cuchiellos de pedernal y otros oxetos cortantes. Atoparon amás ocre que, amás d’usalo como pigmentu, sirvía pa curar les pieles. Taben tan xuntes que los científicos creen que diben dientro d’un morral. A poca distancia había restos de tarucas (un venado andín) y vicuñas. Lo más llamativo vieno dempués: del analís de los güesos, supunxeron que se trataba d’una muyer, d’una cazadora.

“Primero reparamos la estructura ósea del individuu. Como muyeres y homes tienen llixeres diferencies ósees, puede envalorase el sexu con unes poques midíes. Esto funciona cuando los restos esqueléticos tán bien calteníos”, cuenta nun corréu l’antropólogu de la Universidá de California Davis y principal autor del estudiu Randy Haas. Pero nel xacimientu de Wilamaya Patjxa, apenes quedaba parte del craniu, el dentame y fragmentos d’un fémur y xuna tibia. Del coláxenu estrayíu d’estos güesos pudieron determinar la fecha de la muerte: fai 8008 años, 16 años enriba o embaxo. Pol desenvolvimientu del dentame, creen que tendría ente 17 y 19 años. Pero poques pistes sobro’l xéneru.

La presencia d’una proteína nel esmalte dental dexa determinar el sexu de persones soterraes fai milenios

Confirmaron que yera xuna muyer usando xuna sofisticada técnica biomolecular desenvuelta l’añu pasáu llamada analís de la amelogenina, xuna proteína presente nel esmalte dental. “Resulta qu’estes proteínes tán amestaes al sexu y, poro, ye posible envaloralo a partir d’elles con un altu grau de precisión”, esplica Haas, que’l so trabayu acaba de publicar la revista científica Science Advances.

Saber si yera un cazador o xuna cazadora tien la so importancia. La teoría dominante ente los antropólogos y etnógrafos ye que nes antigües comunidaes que dependíen de la caza y la recueya esistía xuna marcada división del trabayu por xéneru: los homes cazaben y les muyeres recoyíen. Pero apenes hai pistes d’esta repartida de xeres nos xacimientos arqueolóxicos. La principal prueba ye circunstancial: Nos grupos humanos actuales qu’entá son cazadores y pañadores, el varón ye’l cazador n’esclusiva.

Partiendo d’esta única cazadora, Haas y los sos colegues revisaron los estudios d’otros 107 enterramientos americanos con restos de 429 individuos dataos entre fai 12.700 años y 7.800 años. 27 de los soterraos reposaben al pie de les sos armes de caza. Y 11 d’ellos yeren muyeres. Extrapolando, esto significaría que más d’un terciu de los cazadores prehistóricos yeren en realidá cazadores, siquier n’América.

“La teoría del home, el cazador, nun se ve confirmada polos datos arqueolóxicos, solo polos etnográficos”, comenta l’arqueóloga de la Universidá Binghamton (EE UU) Kathleen Sterling. “Tradicionalmente, la caza foi considerada como más prestixosa, esixente y peligrosa que la recueya y estos son traces qu’acomuñemos de forma estereotípica como actividaes de los homes”, añede esta investigadora ensin rellacionar col actual estudiu.


L’arsenal topáu al pie de la cazadora incluye puntes de venablos, cuchiellos de pedernal o ocre, usáu para curtir les pieles.

Esta esperta na tecnoloxía lítica prehistórica recuerda que “la caza mayor, como renos o bisontes, nun dependía nin de la fuerza nin de l’habilidá, sinón del númberu: les formes usaes nel pleistocenu consistíen n’emburriar a los fataos escontra cantiles, saltos o trampes, o refundiar llances a les menaes que nun mataríen directamente a los animales, pero los dexaríen mancaos, siendo apatayaos o incapaces de siguir el ritmu de la menada. Naquel tiempu, los humanos vivíen en pequenos grupos, polo que la mayoría de los mozos y adultos seríen necesarios na caza d’una forma o otra”.

“Polo xeneral, como la división del trabayu por xéneru foi llargamente comprobada ente les sociedaes tradicionales, los arqueólogos supunxeron que tamién yera daqué xeneralizáu nel pasáu”, diz l’antropólogu de la Universidá d´Arizona (EE UU) Steven L. Kuhn, que nun intervieno nesta investigación. “Per otru llau, enforma de lo que sabemos sobro esta división del trabayu ta basáu na ideoloxía, no que la xente cree que ye l’ideal”.

Autor:

Maestra de Llingua Asturiana Colexu Carmen Ruiz-Tilve - Uviéu