Publicado en Concursu

VI Entaína a escribir

El vienres 7 de mayu celebróse la sesta edición del concursu de microrrellatos improvisaos n’asturianu Entaína a escribir, que cuntó cola participación de nueve escritores mozos.

El versu de Nel Amaro «Que lloñe mos queda la paz coles palombines xintándonos la conciencia» foi’l puntu de partida sobre’l que los y les escritores teníen que componer un microrrellatu mientres venti minutos. Depués de la llectura pública de los testos y la reunión del xuráu, resultaron gallardonaos:

  • Primer premiu: Inaciu Galán y González
  • Segundu premiu: Alma Hidalgo Lucena
  • Tercer premiu: Gonzalo Llamedo Pandiella
  • Noticia Asturies.com

L’actu cuntó cola presencia de los directores xenerales de Política Llingüística y Mocedá, Antón García y Clara Sierra, y pudo siguise nel programa Conexión Asturias de RTPA: https://www.youtube.com/watch?v=ykvuAfPjVbE

Ésti ye’l testu ganador:

La llibretina’

Aquella muyer del barriu alimentaba a les palombes cada día, de forma cuasi compulsiva. Viérala dende neñu engurriase adulces, anque a min yá me paecía mui vieya cuando probatiblemente nun lo sedría tanto. Yera mui conocida ellí, con nomatos variaos acordies col ciñu o la zuna de caún con ella y les sos acompañantes con ales.

Col tiempu descubrí qu’aquella muyer yera tamién poeta. Repartía pan a les palombes y dacuando sacaba un versu escritu nun papel puercu y regalaba poeminos curtios, inspiraos nel amar o nel odiar, nel desasogiegu o na calma d’un día nel parque coles sos amigues alaes. Nunca nun m’atreví a averame a ella, pero podíame la gana de lleer aquellos versos de los que tanto me falaren.

Una nueche vila durmiendo nun portal y d’una de les bolses que carretaba asomaba una llibreta, la llibretina onde escribía los sos poemes. Nun lo pensé, acerquéme sele y quité-yla.

Al otru día supi que morriera de fríu naquel portal. Como si quita-y aquellos poemes fuera quita-y un cobertor.

Nunca fui quien a lleer los oemes. Guardo la llibterina pero nun soi a ello. Cuando voi al parque tán eses palombres, mirándome, xintándome la conciencia. ¡Qué lloñe me queda la paz!


Nel marcu de la 42 Selmana de les Lletres Asturianes, la Dirección Xeneral de Política Llingüística y l’Institutu Asturianu de la Mocedá entamen Entaína a escribir. VI Concursu de microrrellatos improvisaos n’asturianu pa la xente mozo, que va mandase por estes bases:

Van poder participar quienes tengan ente 14 y 35 años d’edá y s’inscriban mandando un mail a cridj@asturias.org. Nesi corréu tendrán d’incluyir namás el so nome, dos apellíos y fecha de nacimientu. Les inscripciones van poder facese hasta’l 5 de mayu del 2021 a les 14.00 hores.

El concursu va consistir na ellaboración d’un microrrellatu nun tiempu máximu de 20 minutos, a partir del tema y indicaciones que’l xuráu dicte nel momentu d’empezar a escribir.

El concursu va desenvolvese en LLABoral Centru d’Arte y Creación Industrial (Gijón/Xixón) el vienres 7 de mayu del 2021, a partir de les 18.30 hores.

Toles persones participantes van recibir un llibru como regalu.

Van concedese tres premios (1.u, 2.u y 3.u), consistentes en llotes de llibros y discos. Amás, el ganador o ganadora va participar como xuráu nos premios Culturaquí 2021 que convoca l’Institutu Asturianu de la Mocedá. Otra manera, la Dirección Xeneral de Política Llingüística va mirar pola promoción y divulgación de los microrrellatos ganadores y va poder incluyilos en publicaciones o antoloxíes qu’edite.

Cartel VI edición Entaína a escribir

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *