La iniciativa promueve la repartida de 26 cartelos sobro procesos científicos y teoríes que desmienten bulos en 53 conceyos de menos de 20.000 habitantes. Equí puedes descargar los cartelos de la campaña. Fonte: Ciencia.Asturies.es /
Dar visibilidá a procesos científicos que s’atopen detrás d’acciones ya imaxes cotidianes o fomentar el pensamientu críticu frente a creencies pseudocientífiques y bulos. Estos son los principales oxetivos de la campaña “Con-cejos con-ciencia, con-cartelos” que pon en marcha la Universidá d’Uviéu cola collaboración de la Conseyería de Ciencia, Innovación y Universidá del Principáu d’Asturies y que va llegar a 53 conceyos asturianos de menos de 20.000 habitantes que formen parte de la rede de Conceyos con Ciencia.
En concretu, al traviés de la Rede de Conceyos con Ciencia, distribuyéronse un total de 26 cartelos con dos conceutos distintos. El primeru d’ellos busca amosar la ciencia oculta n’imaxes cotidianes gracies al trabayu d’interpretación d’espertos en distintos ámbitos. Xuna vaca, la Fórmula 1, o l’escanciáu d’un culete’ de sidra escuenden procesos físicos, químicos o biolóxicos que pasen desapercibíos de forma habitual y que son revelaos nestos pósteres. El segundu bloque de cartelos escuerre desmontar distintos bulos pseudocientíficos o terminar con determinaos mitos.
Por casu, tal que esplica José Manuel Montejo, del Departamentu de Ciencies de la Educación, “nuna acción común en cualquier sidrería asturiana, como ye l’actu d’echar, los güeyos del científicu apreciaríen la parábola xenerada pola sidra o la conversión d’enerxía potencial en cinética”. Y añede: “Si, amás, l’escanciáu asocede nuna nueche estrellada, daquién con formación científica puede ver la serie de reacciones nucleares que se producen nel interior de les estrelles xenerando enormes cantidaes d’enerxía, o recordar que xuntu cola lluz visible (hνVis) tamién emiten radiación d’otros tipos como microondes (hνMO), infrarroxos (hνDIR) o ultravioletes (hνUV), ente otres”.
Montejo ye unu de los investigadores colos que cuntó la Unidá de Cultura Científica y de la Innovación de la Universidá d’Uviéu (UCC+I) pa la ellaboración de los cartelos. Tamién participaron Antonio Torralba Burrial y Cuadonga Huidobro, del Departamentu de Ciencies de la Educación; Alfonso Fernández, del Departamentu de Química Física y Analítica, Isidro González, Javier Fernández y Bárbara Álvarez, del Departamentu de Física, y Marcu de la Rasilla Vives, del Departamentu d’Hestoria.
La campaña ta financiada pol Ministeriu de Ciencia ya Innovación y la Fundación Española pa la Ciencia y la Tecnoloxía (FECYT).
