- Fonte: infoAsturies / Susana Sela
- David Varela /
- Grupu: la Bonturné /
David Varela ye un artista polifacéticu asturianu; bien conocíu como músicu tradicional, David dedica la mayor parte la so vida a dar conciertos, escenificar el so trabayu, fabricar y tresnar instrumentos tradicionales y tresmitir los sos conocimientos a los demás.
Llueu de trabayar una montonera tiempu per cuenta ayena, David Varela fízose autónomu pa profesionalizar el so oficiu de músicu y axuntar les artes escéniques a les sos representaciones, curiando sobremanera ca detalle. Les milenta oportunidaes que se-y presenten llévenlu a convertise n’actor profesional, collaborando con otros artistes y compañíes de teatru.
Arriendes d’ello, abre un taller d’artesanu pa fabricar y reparar instrumentos de percusión tradicional, con especial atención a los tambores. Gracies a los sos estudios d’una mayestría industrial y la so conocencia de la historia y morfoloxía de los instrumentos colos que trabaya, los sos instrumentos son de alta calidá.
David trabaya tantu la música de direutu como la d’estudiu, componiendo y arreglando les sos pieces, que cásique siempres van endolcaes nes músiques de raigañu. La excelente reputación de David como artista profesional ye testimoniu del so enfotu pola búsqueda la excelencia.
D’otramiente, David ye un experimentáu mayestru de música tradicional, que lleva 3 décades deprendiendo a los sos escolinos a tocar el tambor asturianu y 20 años faciendo lo mesmu col acurdión de botonera, na enseñanza non reglada.
Arriendes del so trabayu como autónomu, David Varela trabaya n’escueles municipales de música y, en collaboración con otros collacios, ufierta servicios como téunicos de producción, vidiu, audio, etc.
