- Fonte: MusicAsturiana.com
El 30 de xunu asoleyaron Música pa tornar páxaros y La Maramoniz, los dos trabayos nuevos de Mapi Quintana dempués de 9 años. Pasín a pasu, l’artista l.leniza va llanzando per per YouTube los distintos videos qu’acompañen a caúna de les canciones que formen l’espectáculu de Música pa tornar páxaros. “La carta“, “Agarráu de María y Lucero” y “Más vieya que la fame” foron los videos que yá publicó.
Agora asolela “A vivir a la montaña”, pieza fecha, como toles demás, pola realizadora catalana Marina Durany.
Música pa tornar páxaros nació como obra escénica en 2022. Esi añu el Festival Intercélticu de Lorient -el más prestoxisu del mundu celta- dedicó la so edición a Asturies y el gobiernu asturianu encargó a Mapi Quintana la obra inaugural del festival. Asina nacieron estos 7 temes nos qu’hai influencies del jazz, la música impresionista y la tradicional asturiana. Una delicia pa los oyíos que va directamente al corazón, porque la emotividá enllena les lletres. Nelles fálase de memoria histórica, de persones queríes que yá nun tán equí… siempre col telón de fondu de Saíle, esi paxarín que fai alcordanza d’Elías García, compañeru musical de Quintana -y ún de los nomes más importantes del folk asturianu- que finó prematuramente en 2019.
«“A Vivir a La Montaña” deprendílu sintiéndo-ylu a Lorena Corripio. Nun sé quien ye l’ autor o la autora. Encantóme too: melodía y lletra. La melodía tien esi saltiquín en mediu la baxada la frase que me tien lloca. Y la lletra ye d’amor entregau y arrogante, como me presten a mí los amores.
Cuando taba arrancando a escribir l’espectáculu Música Pa Tornar Páxaros pa facer nel FIL va dos años, en siguida pensé nesti cantar, vestíu con un acompañamientu inspiráu en “Maiden Voyage” de Herbie Hancock. Na mio cabeza sentía la voz cantando dende lo cimero d’un picu, con potencia, con presencia, maxestuosa, con toes eses notes llargues del pianu, contrabaxu y percusión resonando per baxo, coles otres dos voces enredando y faciendo armoníes inesperaes. Y dexar munchu espaciu pa sentilo sonar too xunto.
L’arte visual de Marina presenta dos personaxes: el ciervu y el Saíle. El ciervu garra’l Saíle y arranquen pela vía alantre. “Llévame onde tú quieras, que l’amor too lo allana”».
