Publicado en Día de...

Celebrámos esti día cola Estaya de la Llingua d’Avilés

Güei ye’l Día Mundial del Mediu Ambiente y celebrámoslu cola Estaya de la Llingua d’Avilés @AytoAviles visitando’l Parque Ferrera n´Avilés

Avilés cunta con trelce parques públicos qu’ocupen una superficie de 272.000 m2. El mayor (81.000 m2) y más utilizáu ye’l de La Ferrera, unu de los más importantes y vistosos d’Asturies.

El parque de La Ferrera, el pulmón del centru de la ciudá, ye un espaciu natural ampliu, bellu y sele que cientos de persones, de toles xeneraciones, aprecien y esfruten diaramente.

Mientres sieglos foi propiedá de los socesivos marqueses de La Ferrera, formando parte de la finca del palaciu del mesmu nome. El Conceyu d’Avilés adquiriolu para usu públicu, siendo inauguráu pol Rei Juan Carlos I en mayu de 1976.

Ta estremáu en dos partes claramente estremaes: el parque d’estilu inglés” y el Xardín Francés”. El primeru combina espacios abiertos de pradería, estanque acuáticu y zones montiegues con exemplares centenarios de texos, cedros, pinos, carbayos, abedurios, castañales, etc. El segundu tien tolos elementos que definen un xardín palaciegu: arboláu, pérgoles, fontes y trazaos singulares de boxes configurando los parterres.

El parque ta dotáu d’abondosu moblame de descansu, amás de servicios como: parque infantil, zones señalizaes y técnicamente dotaes para exerciciu deportivu, incluyendo aparatos ximnásticos, hemeroteca, templete musical, aula de medioambiente, baños públicos, etc.

Abrese a les 7,00 hores y ciérrase a les 23,00, teniendo cinco entraes: poles cais Galiana, Rivero, Cervantes, del Marqués y al traviés del antepar de la Casa Municipal de Cultura.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *