Publicado en NATURA

Una sestaferia de llimpieza…

La Semiente celebra’l Día del Mediu Ambiente
con una sestaferia de llimpieza en La Campa L’Abeduriu

El centru social de L’Entregu entama pa esti sábadu una marcha y una comida popular pa denunciar l’abandonu d’esi espaciu natural de Samartín del Rei Aurelio

Los vecinos denuncien l’abandonu de La Campa l’Abeduriu

Anguaño’l Día Mundial del Mediu Ambiente celébrase con un mensaxe: la necesidá de restaurar el planeta. Y, aprovechando esi lema, el colectivu La Semiente recordó la necesidá de recuperar un espaciu que ye pulmón de les Cuenques. Falamos de La Campa l’Abeduriu en L’Entregu. Y fízolo con una sestaferia de llimpieza y una xira campestre.

Hai una vieya siella na fastera d’El Campiciu que ye un balcón a un paraísu de natura sobro L’Entregu llamáu La Campa l’Abeduriu. Un llugar que los vecinos, denuncien, ta abandonáu. Por eso güei entamaron una sestaferia de llimpieza y concienciación. Y dempués de llimpiar, tiempu pa esfrutar del meyor escenariu pa una espicha ente amigos.

El Centru Social Autoxestionáu La Semiente, de L’Entregu, organiza pa esti sábadu, Día Mundial del Mediu Ambiente, una sestaferia de llimpieza a les once de la mañana en La Campa L’Abeduriu, onde la xente d’esti colectivu va poner tamién unos cartelos animando a les persones visitantes a cudiar y a respetar esi entornu. Darréu, les y los participantes van compartir comida nuna xira popular.

La Semiente quier poner l’atención con esta actividá nel “estáu d’abandonu que sufre l’área recreativa de La Campa L’Abeduriu y la contorna. Un espaciu pensáu pal esfrute de la naturaleza, que cunta con una serie d’infraestructures abandonaes y nun estáu de deterioru mui grande, magar ser de recién construcción”. Quier denunciar amás “la falta de caltenimientu y llimpieza, yá non nes infraestructures namás, sinón del espaciu; nun esisten xeres de llimpieza de monte, nin tampoco se paña la basura anque les poques papeleres esistentes tean llenes y la basura tea espardio per tol área”. Otru problema ye’l de los coches “qu’aparquen en medio’l práu, o les motos y quads que circulen per fuera les pistes esfarrapando la vexetación y un suelu en procesu de recuperación”.

La Campa L’Abeduriu ye una antigua esplotación minera a cielu abiertu na que se fixeron delles intervenciones de recuperación medioambiental dende los años noventa, toes elles con dineru públicu y fundamentalmente coles escueles taller de FUCOMI. Sobre un terrén d’un millón de metros cuadraos, señala La Semiente, “fixéronse llabores de recuperación del suelu, llantáronse miles d’árboles, construyéronse dellos tendeyones d’abellugu, habilitóse un área recreativa con tolos sos servicios, con un llagu, con un rocódromu (que nunca llegó a funcionar pola so peligrosidá). Edificóse un chigre que funcionó na segunda metá de los noventa. Tamién un edificiu destináu a aseos públicos y una capiya. Nuna última fase construyéronse trés cabanes destinaes al turismu que nunca llegaron a estrenase y qu’agora tán mui deterioraes. Como tamién lo ta l’edificiu destináu a unes posibles aules de naturaleza”.

Añade la xente del centru social de Samartín del Rei Aurelio que “l’únicu rincón y l’únicu edificiu que sigue en bones condiciones ye la capiya y lo d’alredor. Eso ye gracies al enfotu y l’esfuerzu de delles vecines de la zona, que s’encargaron de cuidalo. En total, a lo llargo d’esti tiempu invirtiéronse más de tres millones d’euros qu’agora son víctima del abandonu. Un exemplu más de toes aquelles obres ensin planificación nin desarrollu que se fixeron al cargu de los fondos mineros”.

Dende La Semiente afirmen que l’Ayuntamientu de Samartín del Rei Aurelio ha d’asumir el compromisu de recuperar l’Área Recreativa de La Campa L’Abeduriu pa que “vuelva funcionar como nos años noventa y vuelva ser un referente pa esfrutar en familia, con amistaes, poles visitantes o turistes, faer deporte… Recuperar un valor añedíu a la calidá de vida de les habitantes de la cuenca y tamién pal desarrollu sostenible del valle, sumándose otra vez a la oferta d’ociu esistente”.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *